________________
પરમાત્માની સ્વદ્રવ્યથી નિયમિત અષ્ટપ્રકારી પૂજા કરતા થઈ ગયા. સુખડ કેસર પણ જાતે ઘસે તથા પ્રક્ષાલ માટેનું પાણી પણ પોતાના ઘરેથી જ લાવે. પૂજા માટે ચાંદીના ઉપકરણો પણ વસાવી લીધા!
જે કાંઈ પણ સારું જાણવા મળે તેનો તુરત અમલ કરવાની પ્રકૃતિ ધરાવતા અને એક પુત્ર તથા બે પુત્રીના પિતા બનેલા રામસંગભાઇએ ૨૮ વર્ષની વયે બ્રહ્મચર્યનો મહિમા જાણ્યો અને ધર્મપત્ની ઝીકુબાઈની સહર્ષ સંમતિપૂર્વક પ.પૂ.આચાર્ય ભગવંત શ્રીમદ્ વિજયરામચંદ્રસૂરીશ્વરજી મ.સા. પાસે યાવજીવ સંપૂર્ણ બ્રહ્મચર્યવ્રત સ્વીકારવા માટે ગયા. ત્યારે પ્રથમ તો આચાર્ય ભગવંતે તેમને પ્રેકટીસ સ્વરૂપે એકાદ વર્ષ માટે આ અસિધારા-વ્રત સ્વીકારવાની ભલામણ કરી. પરંતુ ક્ષાત્રવટ ધરાવતા આ દંપતિએ યાવજીવ માટે જ વ્રત સ્વીકારવાનો પોતાનો મક્કમ નિર્ણય દૃઢતાપૂર્વક રજુ કરતાં આચાર્ય ભગવંતે આશીર્વાદપૂર્વક તેમને યાવજીવ બ્રહ્મચર્યવ્રત ઉચ્ચરાવ્યો.
આ વ્રતનું અણિશુધ્ધ રીતે પાલન થઈ શકે તે માટે રામસંગભાઇએ કુટુંબીજનોની સંમતિપૂર્વક દુકાનના સમય સિવાય દિનરાત ઉપાશ્રયમાં જ રહેવાનો પ્રારંભ કર્યો. ગાદલાનો પરિત્યાગ કરી સંથારા પર જ શયન કરવા લાગ્યા. જમવા માટે ટિફિન પણ ઉપાશ્રયમાં જ મંગાવવા લાગ્યા. તેમાંથી પણ સુપાત્રદાન-સાધર્મિક ભક્તિ કર્યા પછી જ પોતે વાપરે. બસ વિગેરેની મુસાફરીમાં પણ જો વિજાતીયનો અનાયાસે હેજ પણ સંઘટ્ટો થઈ જાય તો એક ધાન્યના આયંબિલનો સંકલ્પ કર્યો. એ રીતે લગભગ ૨૦૦ જેટલા આયંબિલ થઈ ગયા બાદ આચાર્ય ભગવંત શ્રીમદ્ વિજયભદ્રંકરસૂરીશ્વરજી મ.સા.ના માર્ગદર્શન મુજબ તેમાં યથાયોગ્ય ફેરફાર કર્યો. વ્રતપાલન દ્વારા જેમ જેમ અંતરના અધ્યવસાયો નિર્મળ બનતા ગયા તેમ તેમ ભૂતકાળમાં અજ્ઞાનદશામાં થયેલા પાપો ખટકવા લાગ્યા અને આખરે સમજણ મળતાં એ પાપોની શુધ્ધિ માટે અધ્યાત્મયોગી પ.પૂ.આ.ભ.શ્રીમવિજયકલાપૂર્ણસૂરીશ્વરજી મ.સા. પાસે વિધિવત્ નિર્દભભાવે ભવ આલોચના સ્વીકારી ચડતા પરિણામે બે વર્ષમાં પ્રાયશ્ચિત પરિપૂર્ણ કર્યું. આત્માને સુનિર્મલ બનાવી લીધો.
૧૯
