________________
આરાધનાની વિગત જાણવા માટે જિજ્ઞાસા વ્યક્ત કરતાં પ્રથમ તો તેમણે વિનમ્રભાવે જણાવ્યું કે, 'જેમ વૃક્ષના મૂળિયા ગુપ્ત રહે તેમ ઝાડ મજબુત બને તેવી રીતે સુકૃત પણ ગુપ્ત રહે તેજ ઇચ્છનીય છે.પરંતુ આખરે અમારી પ્રબળ જિજ્ઞાસા આગળ તેમણે નમતું જોખ્યું અને સહજભાવે કેટલીક વિગત જણાવી. તેમજ તેમના વીશસ્થાનક તપના ઉજમણા પ્રસંગે પ્રકાશિત થયેલ આમંત્રણ પત્રિકા પણ પત્રિકા લખનાર પાઠશાળાના પ્રાધ્યાપકશ્રી જીતુભાઇ પાસેથી પ્રાપ્ત થઇ તેમાં પણ રામસંગભાઇની આરાધનાની કેટલીક વિગત હતી. તેના આધારે પ્રસ્તુત લેખ તૈયાર કરવામાં આવેલ છે.[સંપાદક]
'સંગ તેવો રંગ' અને 'સોબત તેવી અસર' એ કહેવત મુજબ તથા એ પ્રકારની સોબતના કારણે ચા-બીડી વિગેર અનેક વ્યસનોથી ભરપૂર એવા રામસંગભાઇ દરબારને આજથી લગભગ ૧૭ વર્ષ પહેલાં તેમની પડોશમાં રહેતા જૈન મિત્ર શ્રી ચંદ્રકાંતભાઇ લાડકચંદ શાહે વ્યાખ્યાનશ્રવણ માટે પ્રેરણા કરી. તે વખતે વઢવાણમાં સંવેગી ઉપાશ્રયમાં પરમશાસન પ્રભાવક પ.પૂ.આચાર્ય શ્રી વિજય રામચંદ્રસૂરીશ્વરજી મ.સા. નાશિષ્ય પૂ.આ.શ્રી વિજયમુક્તિચંદ્રસુરીશ્વરજી મ.સા.ના શિષ્ય શ્રી પૂ. મુનિરાજ શ્રી જયભદ્રવિજયજી મ.સા.નુ ચાર્તુમાસ હતું. જૈન મિત્રની પ્રેરણાથી રામસંગભાઇ મિત્રની સાથે ઉપાશ્રયમાં વ્યાખ્યાન શ્રવણ કરવા જવા લાગ્યા. ધીરે ધીરે જિનવાણીનો રંગ લાગતો ગયો. પૂર્વજન્મના જૈનત્વના સંસ્કારો પ્રબુધ્ધ થતા ગયા. વ્યસનો છુટતા ગયા. સામાયિક પ્રતિક્રમણાદિ ધર્મક્રિયાઓમાં રસ જાગતો ગયો. પર્યુષણમાં ૬૪ પ્રહરી પૌષધ કરવા માટે મિત્રે પ્રેરણા કરી પરંતુ રોજ સવારે સ્નાન કરી ગણપતિની પૂજા નિયમિત કરવાની કુળપરંપરાગત ટેવવાળા રામસંગભાઇને પૌષધ ગમતા હોવા છતાં ગણેશપૂજામાં વિક્ષેપ ન પડે તે માટે પૌષધ ન સ્વીકાર્યા પરંતુ આઠે દિવસ મોટા ભાગનો સમય ઉપાશ્રયમાં ગાળવા લાગ્યા.
ચાર્તુમાસ બાદ શિયાણી તીર્થ સુધી મ.સા.ને વળાવવા પણ ગયા. પછી તો વઢવાણમાં જે કોઇ જૈન સાધુ ભગવંતો પધારે તેમના વ્યાખ્યાન-વાચનાદિનો લાભ લેવા લાગ્યા. પ્રજ્ઞાચક્ષુ અમૂલખભાઇ પાસે બે પ્રતિક્રમણાદિના સૂત્રો કંઠસ્થ કર્યા.
૧૮
