Book Title: Hriday Nayan Nihale Jagdhani Part 02
Author(s): Anandghan, Muktidarshanvijay
Publisher: Matunga Shwetambar Murtipujak Tapagaccha Jain Sangh
View full book text
________________
શ્રી ધર્મનાથજી
524
પ્રભાવે માનવ ભવ-જૈનપણું-વીતરાગ દેવ-નિગ્રંથ ગુરુ વગેરે મળ્યા, તો હવે પ્રભુની સાથેની પ્રીતિમાં ભંગ ન પડવા દઉં !
હું બહિર્મુખ વૃત્તિએ કરીને મારો આત્મ ધર્મ-સ્વરૂપ ધર્મ-વીતરાગ દશા ભૂલી જાઉં તો જ પ્રભુની સાથેની પ્રીતમાં ભંગાણ પડે. આત્મત્વ ધર્મે પ્રભુ સાથે મારે તુલ્યતા છે. તેને કારણે પ્રભુ સાથે પ્રીતિ ઉત્પન્ન થઈ છે, તેમાં ભંગાણ ન પડે તેમ ઇચ્છુ છું કારણકે પ્રભુ સાથે પ્રીતિમાં ભંગ પડતાં અર્થાત્ મારો શુદ્ધ આત્મધર્મ ભૂલાઈ જતાં મારે ઘણુ દુઃખ અનુભવવુ પડે છે; તે હવે ન થાવ તેમ યોગીરાજ પ્રભુને પ્રાર્થી રહ્યા છે.
સિસોદિયા વંશમાં થયેલા રાણાપ્રતાપે પોતાની બેન-દીકરીઓને કોઇપણ ભોગે મુસ્લિમ બાદશાહોને ન જ આપી તે ન જ આપી. તે માટે જે સહન કરવુ પડ્યું તે કર્યું પણ પોતાનુ કુળ ન વટલાવ્યું. તેમ હે પ્રભો! હું પણ હવે રાગી-દ્વેષી દેવોને ભજીને કે રાગ-દ્વેષના ભાવોને મનમાં લાવીને મારું ચૈતન્યકુળ કે જે આપ પરમાત્માની તુલ્ય છે તેને નહિ જ વટલાવું. નહિ જ અભડાવું. નિરંતર આત્મભાવમાં રમમાણ રહીને પરમાત્માની સાથે જ અનુસંધાન કરતો રહીશ. તે માટે ભક્તિના રંગે • રંગાઈને રહીશ. હે પ્રભો ! મારી તે ભક્તિમાં ભંગ ન થાય, તેવું હું નમ્રભાવે બે હાથ જોડી આપની પાસે માંગુ છું! કારણકે આપની સાથેની પ્રીતિમાં ભંગ પડે તો ભક્તિનો રંગ જ ઊડી જાય તેમ છે.
વિવેક-વૈરાગ્ય-વીતરાગતા, જેવા છે તેવા અતિવિશુદ્ધ પુણ્યના ઉદયે ઓળખાય છે. બધી જ જાતના આગ્રહો-પક્કડો-મત-ગચ્છ-સંપ્રદાય; આ બધાંથી જે મુક્ત થઈ ગુણોના ઉદ્યાનમાં ક્રીડા કરે છે, તે બંધનથી છૂટે છે, તેને વીતરાગતા ઓળખાઈ ગયા પછી પરમાત્માની સાથેની પ્રીતિમાં ભંગ પડતો નથી.
જે ફરનાર નથી, જે ટળનાર નથી, જે નિશ્ચિત છે તે ‘ભવિતવ્યતા’.
