________________
શ્રી શાંતિનાથજી
આત્મા જ્યાં સુધી પોતાના શાંતરસમય સ્વરૂપને પિછાણીને તેમાં નહિ ડૂબે ત્યાં સુધી બીજા કોટિ ઉપાયોથી પણ શાંતિ મળવાની નથી. શાંતિ એ બહારમાંથી મળનારી ચીજ નથી. શાંતિ પોતાના આત્મામાં જ છે. સંકલ્પ-વિકલ્પનો ત્યાગ કરીને આત્મા જ્યારે પોતાના નિર્વિકલ્પ સ્વરૂપમાં લીન થાય ત્યારે તેને શાંતિની પ્રાપ્તિ થાય છે. આ વિષયમાં જયેન્દ્ર મહેતાના ઉદ્ગારો –
શોધે છે શું કિનારે મોતીઓને શોધનારા વસ્તુ કદીય મોંઘી મળતી નથી સહજમાં મોતીને મેળવે છે મઝધાર ડૂબનારા.
634
શાંતિસરૂપ ઈમ ભાવશે, ધરી શુદ્ધ પ્રણિધાન રે, આનંદઘન પદ પામશે, તે લહેશે બહુમાન રે.. શાંતિ..૧૫
અર્થ : શાંતિ એ આત્માનો સ્વભાવ છે સ્વરૂપ છે. શાંતિપદની શક્તિ દરેક આત્મામાં ગુપ્તપણે રહેલી છે, એમ સમજીને જે કોઇ આત્મા શાંતિપદની પ્રાપ્તિનું ભાવન ચિત્તની એકાગ્રતાથી કરશે, પોતાના પરમ સ્વરૂપના ધ્યાનમાં તલ્લીન બનશે, શુભ ધ્યાનવડે આંતરપટમાં ખોવાઇ જશે, તે અંતે પોતાના આત્મામાં જ આનંદના સમુહરૂપ એવા મોક્ષપદને
પામશે અને જગતમાં ડગલે ને પગલે માન-સન્માનને પ્રાપ્ત કરશે. ભલે એને માન-સન્માનની પડી ન હોય પણ જગત તેને સામેથી માન-સન્માન આપશે. એ વ્યક્તિ જ એની પ્રગટ પ્રભુતાથી એવી પ્રભાવશાળી બની જાય છે કે એની પ્રતિભામાં અંજાઇ જઇ હાથ જોડી દેવાય છે-વંદન થઇ જાય છે. સૌ કોઇ આત્મા શાંતિનાથ પ્રભુના પરમ શાંતરસમય સ્વરૂપને ઓળખીને અખૂટ શાંતિને પામે અને જીવનમાં રસાધિરાજ એવા શાંતરસની ઉપાસના કરે એ જ એકની એક સદાની શુભાભિલાષા.
આત્મા માટે જૂઓ તો સમ્યગ્દર્શન, આત્મા વડે જૂઓ તો દિવ્યદર્શન-કેવળદર્શન.
