Book Title: Hriday Nayan Nihale Jagdhani Part 02
Author(s): Anandghan, Muktidarshanvijay
Publisher: Matunga Shwetambar Murtipujak Tapagaccha Jain Sangh
View full book text
________________
શ્રી કુંથુનાથજી ,
688
છે. આવા આત્માઓને મોશે પહોંચવા માટે તેમજ મોક્ષમાર્ગે આગળ વધવા જરૂરી સામગ્રીઓ સહજ રીતે મળતી રહે છે. બાહ્ય ક્રિયાકાંડ અને તપ-જપ ઉપર આજે જેટલો ભાર મૂકવામાં આવે છે, તેની અપેક્ષાએ હદયની આવી સરળતા ઉપર તેટલો ભાર મૂકવામાં આવે તો જીવ જલ્દીથી પરમાત્મા થવાના માર્ગે આગળ વધી શકે.
અનંત-અનંત કાળથી ધર્મ કરવા છતાં જીવો કેમ મોક્ષે જતા નથી? એ પ્રશ્નના સમાધાનમાં એમ કહી શકાય કે આરાધના કરવા છતાં જે સરળતાદિ ગુણો કેળવાવા જોઈએ તેના ઉપરની રુચિ, બહુમાન જે જાગવા જોઈએ તે જાગતા નથી તેમજ દોષદૃષ્ટિ-કદાગ્રહ વગેરે જે નીકળવા જોઈએ તે નીકળતા નથી માટે જીવો મોક્ષમાર્ગે આગળ વધતા નથી. - સ્વદર્શનમાં પણ કલિકાલમાં તેમજ નજીકના જ ભૂતકાળમાં થઈ ગયેલા અજાતશત્રુ પન્યાસ ભદ્રંકરવિજયજી મહારાજા, અધ્યાત્મયોગી આ.દેવ. શ્રીમદ્વિજય કલાપૂર્ણસૂરિજી મહારાજા તેમજ વર્તમાનમાં વિદ્યમાન સિદ્ધાંત દિવાકર આચાર્યદેવ શ્રી જયઘોષસૂરિજી મહારાજા અને નિજાનંદની મસ્તીમાં મસ્ત આ.દેવ શ્રી યશોવિજયજી મહારાજા એ મોક્ષમાર્ગના ઉત્કૃષ્ટ આરાધક કહી શકાય તેમજ નિકટ મોક્ષગામી તરીકે કલ્પી શકાય. કારણકે આ આત્માઓ વર્તમાનકાળમાં ચાલતા વાદ-વિવાદ-વિખવાદ-નિંદા-કુથલી વગેરે દોષોથી અત્યંત મુક્ત હતા અને હોય છે તેમજ અનાગ્રહી સ્વભાવને વરેલા અને ગુણગ્રાહી દષ્ટિના પરમ ઉપાસક હતા અને વર્તમાનમાં છે. - યોગીરાજ આનંદઘનજી મહારાજ આ સ્તવનની છેલ્લી કડીમાં મનને કાબુમાં લેવા માટે આવું સાધનામય-ઉપાસનામય જીવન જીવવાનો સંકેત આડકતરી રીતે અણસારી રહ્યા છે, જેનો આપણે સૌ સ્વીકાર કરીએ એ જ એક શુભભાવના !
ઉપશમ સમકિત મોહને દબાવે છે. ક્ષયોપશમ સમકિત મોહને સુધારે છે.
ક્ષાયિક સમકિત મોહને ખતમ કરે છે.
