Book Title: Samveg Rangshala
Author(s): Vinayrakshitvijay
Publisher: Shastra Sandesh
View full book text
________________
सीसाऽणुसासणे वि हु, पारद्धे अह इमं तुमं पि खणं । वण्णिज्जंतं जइपहु!, पहिट्ठचित्तो निसामेहि
॥ ४४०२॥ वज्जेह अप्पमत्ता! अज्जा-संसग्गिमऽग्गिविससरिसं। अज्जाऽणुचरो साहू, पावइ वयणिज्जमऽचिरेण ॥ ४४०३॥ थेरस्स तवस्सिस्स वि, सुबहुसुयस्स वि पमाणभूयस्स। अज्जासंसग्गीए, निवडइ वयणिज्जदढवज्जं
॥ ४४०४ ॥ किं पुण तरुणो अबहुस्सुओ य, अविगिट्ठतवपसत्तो य । सद्दाऽऽइगुणपसत्तो, न लहइ जणजपणं लोए ॥ ४४०५ ॥ सव्वत्तो वि विमुक्को, साहू सव्वत्थ होइ अप्पवसो । सो चेव होइ अज्जाओ, अणुचरंतो अणऽप्पवसो ॥ ४४०६॥ साहुस्स नऽत्थि लोए, अज्जासरिसी हु बंधणे उवमा । लद्धपसराओ जं ताओ, भावसंमग्गखलणीओ ॥४४०७॥ जइ वि सयं थिरचित्तो, तहा वि संसग्गिलद्धपसराए। अग्गिसमीवे घयमिव, मणं विलीएज्ज अज्जाए ॥ ४४०८॥ एमेव सेसमहिला-वग्गेण वि दूरओ पयत्तेण । वज्जेज्जह संसग्गिं, इंदियदमदारुदहणऽग्गिं
॥ ४४०९॥ महिला कुलं सवंसं, पई सुयं मायरं च पियरं च । विसयंऽधा अगणंती, दुक्खसमुद्दम्मि पाडेइ
॥ ४४१०॥ माणुण्णयस्स पुरिसदुमस्स, नीयो वि आरुहइ सीसं । महिलानिस्सेणीए, गुणगणफलकलियसाहस्स
॥ ४४११॥ माणुण्णया वि पुरिसा, ओमंथिज्जंति दुट्ठमहिलाहिं । जह अंकुसेण करिणो, निसियाविज्जति बलिणो वि ।। ४४१२॥ सुव्वंति य महिलऽत्थे, लोगे जुज्झाई बहुपयाराई । भयजणयाइं जणाणं, भारहरामायणाऽऽईसु
॥४४१३॥ नीयंगमाहिं सुपओहराहिं, उप्पित्थमंथरगईहिं । महिलाहिं निण्णयाहिं व, गिरि व्व गरुया वि भिज्जंति ॥४४१४॥ सुट्ट वि जियासु सुट्ट वि पियासु, सुट्ट वि परूढपेमासु । महिलासु भुयंगीसु व, वीसंभं नाम को कुणइ ॥ ४४१५॥ वीसंभनिब्भरं पिहु, उवयारपरं परूढपणयं पि। कयविप्पियं पियं झत्ति, निति निहणं हयाऽऽसाओ
॥ ४४१६ ॥ सीमन्तिणीण सीम, दोसाण लहंति नेय विउसा वि । जं गुरुदोसाण जए, ताओ च्चिय होंति सीमाओ ॥४४१७॥ रमणीयदसणाओ, सूमालंऽगीओ गुणनिबद्धाओ। नवमालइमाला इव, हरंति हिययं महिलियाओ
॥ ४४१८॥ किंतु महिलाण तासिं, दंसणसुंदेरजणियमोहाणं । आलिंगणमऽचिरा देइ, वज्जमालाण व विणासं
॥४४१९ ॥ निक्कवडपेमपरवसमणो वि, सोमालियाए नरनाहो । पंगुलहेउं छूढो, नईए गंगाऽभिहाणाए
॥ ४४२०॥ तहाहिनयरम्मि वसन्तपुरे, जियसत्तुनराऽहिवो जयपसिद्धो। सोमालियाऽभिहाणा, भज्जा निप्पडिमरूवा से
।। ४४२१॥ दढमऽणुरागपराजिय-हियओ सो तीए सद्धिमऽणवरयं । परिचत्तरज्जकज्जो, कीलंतो वोलइ कालं
॥ ४४२२॥ रज्जं च विसीयंतं, दटुं मंतीहिं तीए सह सहसा । निच्छूढो सो पुत्तो य, तस्स रज्जम्मि अहिसित्तो
॥४४२३॥ जियसत्तू पुण मग्गे, गच्छंतो निवडिओ अडविमज्झे । तण्हाऽऽउराए देवीए, मग्गिओ पाणियं पाउं
॥ ४४२४ ॥ ओसहिवस-अविणस्सिर-भुयरुहिरं पाइया य नरवइणा । मा बीहेज्ज त्ति विचि-तिरेण अच्छीणि ठइऊण ॥ ४४२५॥ पुणरवि छुहाऽभिभुया, ऊरुं छेत्तुं असाविया मंसं । संरोहिणीए ऊरू, पुणण्णवो तक्खणं च कओ ॥४४२६॥ पत्ताणि दूरनयरे, तस्साऽऽभरणेहिं नरवई ताहे। नीसेसकलाकुसलो, वाणिज्जं काउमाऽऽढत्तो
॥४४२७॥ दिण्णो य तीए बीयो, पंगू णेणं सुनिम्वियारो त्ति । गीयच्छलियकहाऽऽईहिं, नवरि तेणऽज्जिया देवी ॥ ४४२८॥ जाया तदेगचित्ता, भत्तारोवरि गया पओसंच। अवरम्मि अवसरम्मि, उज्जाणगओ सुवीसत्थो
॥ ४४२९॥ जियसत्तू पाइत्ता, पभूयतरमइरमऽमरसरियाए। पक्खित्तो किर तीए तं पंगुलमऽभिसरंतीए
॥४४३०॥ इय निययमंससोणिय-पणामणेणं पि पीणियंऽगीओ। विस्सुमरिओवयाराओ, निति निहणं हयाऽऽसाओ ॥ ४४३१ ॥ पाउसकालनईउ व्व, जाओ निच्चं पि कलुसहिययाओ। धणहरणकयमईओ, चोरो व्व सकज्जगरुयाओ ॥ ४४३२॥ वग्घि व्व घोररूवाओ ताओ संझ व्व चवलरागाओ। मयभिभलाओ णिच्चं, गयाऽऽवलीओ व्व महिलाओ ॥४४३३ ॥ अलिएहि हसियभणिएहि, अलियरूण्णेहिं अलियसवहेहि। विवसं कुणंति चित्तं, नरस्स सुवियक्खणस्साऽवि ॥४४३४ ॥ महिला पुरिसं वयणेहिं, हरइ हियएण हणइ निक्करुणा । अमयमइया व वाया, विसमयमिव होइ हिययं से ॥४४३५ ।। सोयसरि दुरियदरी, कवडकुडी महिलिया किलेसकरी। वइरविरोयणअरणी, दुक्खखणी सोक्खपडिवक्खा ॥४४३६॥ एत्तो च्चिय मायरमऽवि, सुसं पि धूयं पि नेव एगते । भासिति महासत्ता, मा सवियारं मणो होहि
॥ ४४३७॥ अविहियपरियम्मो सम्मं, को नाम नामिउं तरइ । वम्महसबरसरोहे, दिविच्छोहे मयच्छीणं
॥ ४४३८॥
૧૨૦
Page Navigation
1 ... 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378