Book Title: Samveg Rangshala
Author(s): Vinayrakshitvijay
Publisher: Shastra Sandesh
View full book text
________________
सुयइ सुयंतस्स सुयं, संकियखलियं भवे पमत्तस्स । जागरमाणस्स सुयं, थिरपरिचियमऽप्पमत्तस्स
॥७३५६ ॥ सुयइ य अयगरभूओ, सुयं च से नासए अमयभूयं । होही ! गोणब्भूओ, नट्ठम्मि सुए अमयभूए
॥ ७३५७॥ ता भो देवाऽणुपिया!, जिणिउं निद्दापमायपरचक्कं । अप्पडिहयप्पबोहो, विहरसु थिरपरिचियसुयऽत्थो ॥ ७३५८॥ एवं चउत्थमुवइट्ठ-मेत्थ निद्दाऽभिहाणपडिदारं । एत्तो विगहादारं, पंचमगं पि हु पवंचेमि
॥ ७३५९॥ विविहा विरूविगा वा, अहवा संजमविबाहगत्तेण। संभवइ जा विरुद्धा, कहा वि विगह त्ति सा भणिया ।। ७३६०॥ विसयं पडुच्च सा पुण, चउप्पयारा परूविया समए। इत्थिकहा भत्तकहा, देसकहा तह य रायकहा
॥ ७३६१॥ इत्थीणं इत्थीसु व, कह त्ति इत्थीकहा मुणेयव्वा । तद्दारेणं संजम-विरोहिगा जा उ सा विकहा
॥ ७३६२॥ जाइकुलरूवनेवत्थ-गोयरा थीकहा भवे चउहा । तत्थवि खत्तिणिबंभणि-वेसिणिसुद्दीण मज्झाओ
॥ ७३६३॥ अण्णयरजाइयाए, पसंसणा निंदणा व कीरइ जा । सा जाइकहा भण्णइ, तीए सरूवं इमं तु जहा
॥ ७३६४॥ धी! जीविएण खत्तिणि-बंभणिवेसीण बालविहवाणं । जीवन्तमयाए सव्वओ वि तह संकणिज्जाणं ॥ ७३६५॥ सुद्दीओ च्चिय मण्णे, धण्णाउ जयम्मि नवरमेक्काउ। नो जाण नवनवऽण्णऽण्ण-पुरिसकरणे वि दोसोऽत्थि ॥७३६६ ॥ उग्गाऽऽइ-कुलुप्पण्णाण-मऽण्णतरगाण जा पुण पसंसा । निंदा वा किर कीरइ, भणंति तं कुलकहं ति जहा ॥७३६७ ॥ चोलुक्कसुयाणं चिय, तहाविहं साहसं न अण्णाणं । निप्पेमा वि हु पविसंति, जाउ जलणं पइम्मि मए ॥ ७३६८॥ जा पुण रूवपसंसा, अंधिप्पभिईण अण्णतरगाए। निंदा वा तव्विउणो, तं रूवकहं भणंति जहा
॥ ७३६९॥ लीलाललंतलोयणमुहीसु, लायण्णसलिलजलहीसु । रइरमणो विहु अंधीसु, चेव सव्वंगमऽल्लीणो
॥ ७३७०॥ अहवाधूलिपंगुरियतणू, जउमयमणिया वि नो गले बहुया। जट्टीए कारविया, उट्ठवइस्सं तहवि पहिया
॥ ७३७१॥ तासि चिय अण्णयरीए, जाउ नेवत्थसंसणाऽऽइया । सा पुण नेवत्थकहेह, देसिया तन्विऊहि जहा
॥ ७३७२॥ अत्तुच्छाऽणच्छेणं, नेवत्थेणं सुछाइयंऽगीए। वियसंतनयणनीलु-प्पलाए सोहग्गवावीए।
॥ ७३७३॥ नारीए उ दिव्वाए, धिरऽत्थु तारुण्णयस्स तरुणेहिं । लायण्णजलं नयणंऽ-जलीहिं नाऽऽपिज्जए जीए ॥ ७३७४ ॥ भत्तकहा वि चउद्धा, आवायकहा तहेव निव्वावे । आरंभकहा तइया, निट्ठाणकहा चउत्थी उ
।। ७३७५॥ आवायकहा इह रसवतीए, एवइयगाउ सागाऽऽई। एत्तियमेत्ता य घयाऽऽ-इणो रसा पुण पउत्त त्ति
॥ ७३७६ ॥ निव्वावकहा भण्णइ, एत्तियमेत्ता उ वंजणपयारा । तह पक्कण्णविसेसा, एवइया तत्थ भोज्जे त्ति
॥ ७३७७॥ अह आरंभकहा पुण, जलथलखहयरजियाण उवओगो । एत्तियमेत्ताण फुडं, संजायइ तत्थ भोज्जे त्ति ॥ ७३७८॥ निट्ठाणकहा एसा, सयं व पंच व सया सहस्सं वा। किं बहुणा लक्खाऽऽइ वि, उवजुज्जइ तत्थ भोज्जे त्ति ॥७३७९ ।। देसकहा वि चउद्धा, छंदकहा विहिकहा वियप्पकहा । नेवत्थकहा य तहा, तत्थ य देसो उ मगहाऽऽई ॥ ७३८०॥ छंदो गम्माऽगम्मं, जह किर लाडाण माउलगधूया । गम्मा गोल्लाऽऽईणं, भगिणि च्चिय सा अगम्मेव ॥ ७३८१ ॥ अहवा उ उइच्चाणं, माउसवत्ती जहा भवे गम्मा। अण्णेर्सि नेव तहा, जणणि व्व इमा उ छंदकहा
॥ ७३८२॥ तप्पढमयाए जं जत्थ, भुज्जए सा भवे उ देसविही। तीए कहा पुण जा सा, देसविहिकहा मुणेयव्वा
॥ ७३८३॥ अहवा विवाहभायण-भोयण मणिव्वए पसाहणाऽऽईणं । जा विरयणा विहीए, कहेह सा विहिकहा होइ ॥ ७३८४॥ अह होइ विगप्पकहा, तत्थ विगप्पो हु सासनिप्फत्ती। तह वप्पकूवसारणि-नइरेल्लगसालिरोप्पाऽऽई
॥ ७३८५॥ घरदेवउलविभागो, तहा निवेसो य गामनगराऽऽई । एमाऽऽईओ तस्स उ, कहा भवे इह वियपकहा
॥ ७३८६॥ नेवत्थं इह भण्णइ, इत्थीपुरिसाण संतिओ वेसो। सो य दुहा साहाविय-भूसापच्चइयभेएणं
॥ ७३८७॥ तस्संसा निंदा वा, नेवत्थकहा भवे मुणेयव्वा । इइ चउहा देसकहा, रायकहा भण्णए अहुणा
॥ ७३८८॥ सा वि चउद्धा भणिया, निज्जाणकहा तहेव अइयाणे । होइ बलवाहणकहा, तह कोट्ठाऽगारकोसकहा ॥ ७३८९ ॥ गामनगराऽऽगराओ, निग्गमणं नरवइस्स निज्जाणं । एएसुं चिय जं पविसणं तु तं बेंति अइजाणं
॥ ७३९०॥ निज्जाणं अइयाणं, पडुच्च जं वण्णणं णरेंदस्स । सा किर निज्जाणकहा, अइयाणकहा य होइ तहा
॥ ७३९१॥ तहा
૨૦૮
Page Navigation
1 ... 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378