Book Title: Samveg Rangshala
Author(s): Vinayrakshitvijay
Publisher: Shastra Sandesh
View full book text
________________
असहायसहायत्तं, करेंति जं संजमं करेंतस्स । एएण कारणेणं, नमणिज्जा साहुणो होति
॥ ९९६०॥ न य एत्तो उवयारो, अण्णो वि हु विज्जए जए सारो । जमुवटुंभो कीरइ, पज्जंताऽऽराहणासमए
॥ ९९६१॥ धण्णो य सो महप्पा, जेणं आराहणासुनावाए । दुहमयरनियरकिण्णो, तिण्णो व्व भवण्णवो भीमो
॥ ९९६२॥ अह थेरेहिं भणियं, भयवं! एत्तो कहिं स उववण्णो। कइया य निहयकम्मो, निव्वाणं पाविही कहसु ॥ ९९६३॥ तिहुयणभवणऽब्भंतर-विस्सुयजसवीरनाहसिस्सेण । पढमेण तओ भणियं, एगग्गमणा णिसामेह
॥ ९९६४॥ सो महसेणमुणिवरो, सम्म आराहणाए थिरचित्तो। सुरवइकयप्पसंसा-कुवियाऽमरविहियविग्घो वि
॥ ९९६५॥ झाणाउ निमेसं पि हु, अचलंतो मंदरो व्व काऊण । कालं सव्वट्ठम्मि, भासुरबोंदी सुरो जाओ
॥ ९९६६॥ आउक्खएण तत्तो, चविऊणं एत्थ जंबुदीवम्मि। उप्पज्जंतनिरंतर-जिणचक्किदसारवग्गम्मि
॥ ९९६७॥ पुव्वविदेहे वासे, वासवपुरिमणहराए नयरीए । अवराजियाए जियवेरि-वग्गविक्कंतकित्तिस्स
।। ९९६८॥ कित्तिधरधरावइणो, वयणोहामियमयंकबिबाए । बिबाऽहराए देवीए विजयसेणाऽभिहाणाए
॥ ९९६९॥ मुहपविसंतचिरुग्गय-संपुण्णमयंकसुमिणकयसूओ। गब्भे पाउब्भविही, पुत्तत्तेणं महप्पा सो
॥ ९९७० ॥ अट्ठमराइंदिय-समहियमासेसु नवसु विगएसु। होही य तस्स जम्मो, सोहणनक्खत्ततिहिजोगे.. ॥ ९९७१ ॥ अच्चंतपुण्णपगरिस-आगरिसियमाणसा य संनिहिया। देवा तज्जम्मम्मि, पडिसंतरयं दिसाभोगं
॥ ९९७२ ॥ वायंतमंदपवणं, कीलंतजणं समंतओ काउं। कुंभग्गसो खिविस्संति, पवररयणाई नगरीए
॥ ९९७३॥ अह मंगलमुहलमिलंत-वारविलयासहस्सरमणीयं । रमणीयमणिविभूसण-भूसियनीसेसनयरजणं
॥ ९९७४॥ नयरजणदिज्जमाण-प्पभूयधणतुट्ठमग्गणयलोगं । मग्गणलोउक्कित्तिज्ज-माणपायडगुणप्पसरं
॥ ९९७५ ॥ गुणपसरसवणसरहस-मिलंतसामंतचक्ककयतोसं । वद्धावणयं होही, महया रिद्धीसमुदएणं
॥ ९९७६ ॥ उचियसमयम्मि पियरो, रयणुक्करवरिसणेण य जहत्थं । रयणायरो त्ति नामं, तस्स पइट्ठावइस्संति
॥ ९९७७॥ उम्मुक्कबालभावो, कमेण अहिगयसमत्थसत्थऽत्थो। कइवयसमवयसुइवेस-विउससुवयस्सपरियरिओ ॥ ९९७८॥ पयईए च्चिय विसय-प्पसंगविवरंमुहो भवविरागी। वियरंतो लीलाए, मणहरकाणणपएसेसु
॥ ९९७९ ॥ एगम्मि अवसरे नयरि-पासपरिवत्तिपव्वयनिगुंजे। सो पेच्छिही विसाले, सिलायले अणसणपवण्णं
॥ ९९८०॥ संनिहिनिसण्णमुणिजण-सव्वाऽऽयरदिज्जमाणअणुसहूिँ। विविहतवकिसियकायं, दमघोसऽभिहाणमुणिवसभं ॥९९८१ ॥ तं पेच्छिऊण तस्स य, कत्थ वि य मए वि एरिसाऽवत्था । सयमेव समणुभूय त्ति, ईहापोहं करेंतस्स ॥९९८२ ॥ जाईसरणं उप्पज्जिही लहुं तदणुभावओ सम्मं । सुमरियपुव्वभवऽब्भत्थ-सयलआराहणविहाणो
॥ ९९८३॥ पासं व घराऽऽवासं, विसं व विसए धणं पि निहणं व। पियजोगसुहं दुक्खं व, बुद्धिचक्खूए पेहंतो
॥ ९९८४॥ सव्वविरई पवज्जिउ-कामो वि हुजणणिजणगवयणेण । दारपरिग्गहविमुहो, वसिहि गेहे कइवि वरिसे ॥९९८५॥ नवरं विसालसाला-मणहरगोउरविरायमाणाणि । उत्तुंगसिंगसोहा-पहसियहिमसिहरिसिहराई
॥ ९९८६॥ पवणपकंपिरधयवड-रणंतमणिकिंकिणीमणहराई। हरिणंक-कुमुयखीरोय-फेणफलिहुज्जलपहाई
॥ ९९८७॥ गायतथुणंतपढंत-भव्वहलबोलवाउलदिसाइं। अणवरयपयट्टूसव-कीरंतविसेसपूयाई
॥ ९९८८॥ देवंगदूसविरझ्य-उल्लोयविरायमाणमज्झाई । मणिकुट्टिमतलनिम्मिय-मुत्ताहलवरचउक्काई
॥ ९९८९ ॥ डझंतनिरंतरकुंदुरुक्क-घणसारसुरहिधूवाई। कुसुमोवहारपरिमल-मिलंतरणझणिरभमराई
॥ ९९९०॥ अइसंतकंतसुंदर-सरूवजिणबिंबसोभमाणाई। काराविही विहीए, पउराई जिणिदभवणाई
॥ ९९९१ ॥ अइदुक्करतवचरणोवउत्त-मुणिपज्जुवासणानिरओ। साहम्मियजणवच्छल्ल-संगओ उवसमपहाणो
॥ ९९९२॥ लोगविरुद्धच्चाई, जत्तेणं विजियइंदियग्गामो। सम्ममऽणुव्वयगुणवय-सिक्खावयपालणपहाणो
॥ ९९९३॥ उवसंतवेसधारी, पडिमाऽणुट्ठाणविहियपरिकम्मो । गमिऊण केत्तियं पिहु, कालं निरवज्जवित्तीए
॥ ९९९४ ॥ स महप्पा रायसिरिं, नयरिं धणकणगरयणसंभारं। अम्मापियरो दढनेह-निब्भरं बंधवजणं च
॥ ९९९५॥
૨૮૨
Page Navigation
1 ... 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378