________________
બચાવો, બચાવો, એકલા યાત્રાળુને કોઈ બચાવો.
રા' ગ્રાહરિયાનો આ પોકાર એળે નહોતો જવાનો, એથી એ જંગલમાં જ વસતાં ધોળીઆઈના કાને એ પોકાર અથડાયો, આઈને થયું કે, કોઈ યાત્રાળુ પર હુમલો થયો લાગે છે અને એણે જ જીવ બચાવવા આવો સાદ પાડ્યો હોવો જોઈએ. આશરો ઇચ્છનારાને આધાર આપવા માટે જાણીતાં આઈ ધોળી આવો સાદ સાંભળીને ઝાલ્યાં ન રહી શક્યાં. એ વીરાંગના હતાં. એથી તલવાર ઘુમાવતાં ઘુમાવતાં એઓ સાદની દિશામાં દોડી ગયાં. એક પુરુષ પર હુમલો કરનારા ચાર-પાંચ ગરાસિયાઓ નજરે પડતાં જ એ વીરાંગનાએ રાડ પાડી : એકલા અને શસ્ત્ર-વિહોણા માણસ પર આ રીતે હુમલો કરતાં તમને શરમ નથી આવતી?
ધોળી આઈને સૌ પૂજ્ય-ભાવે પિછાણતા-નિહાળતા હતા. એથી એમની આમન્યાનો ભંગ ગરાસદારોથી કરી શકાય એવો ન હોવાથી પાંચ પગલાં પાછાં પડી જઈને સૌ હાથ જોડીને ખડા રહી ગયા : એમણે સમસ્વરે વિનંતીની ભાષામાં કહ્યું : આઈ ! આપનું વચન તો અમારે શિરોધાર્ય જ કરવાનું હોય. પણ સાપને દૂધ પાવાની જેમ આ શત્રુને આશરો આપવા જેવો નથી. વેશપલટો કરીને નીકળેલા આ માણસને ઓળખી લેવા જેવો છે. આ માણસ બીજું કોઈ નહિં, રા' ગ્રાહરિયા પોતે જ છે. ઘણાં વર્ષો બાદ આ માણસ આજે હાથમાં આવ્યો છે. માટે આને તો અમે જીવતો નહિ જ રહેવા દઈએ. અમારા કેટલાંયના ગામગરાસ આ દુશ્મને પચાવી પાડ્યા છે. અરે ! આથીય આગળ વધીને આપના પતિ રત્ના-ચારણનું ભરસભામાં અપમાન કરનારો પણ આ જ રા' ગ્રાહરિયો હતો. આજે ઘણા વખતે એ હાથમાં આવ્યો છે. માટે એમને અમારી રીતે એની સાથેનો હિસાબ પતાવી દેવા દો. આઈ ! આપને પગે પડીને વીનવીએ છીએ કે, આજે આપ અમારી આડે ન જ આવતાં.
સંસ્કૃતિની રસધાર ભાગ-૨
>
૭
