________________
ધનપતિ તરફથી હકારાત્મક જવાબ મળતાં જ સમ્રાટે ધનુષ્યમાંથી છૂટતા બાણ જેવો સણસણતો સવાલ કર્યો કે, ૩૦ વર્ષ પૂર્વે સમ્રાટ કલશનું જ શાસન ચાલતું હતું. એથી આ થાપણમાં કલશ પછી થઈ ગયેલા સમ્રાટોનાં નામ ઉપરાંત મારા પણ નામની મુદ્રાથી અંકિત સોનામહોરો ક્યાંથી આવી જવા પામી? આનો જવાબ મારે જોઈએ. થાપણ સાથે તમે ચેડાં કર્યા જ છે, એનો આ પ્રબળ અને સજ્જડ પુરાવો છે. વળી આ થાપણમાંથી થોડો પણ ઉપાડ ન કર્યાની લક્ષ્મીચંદની કબૂલાત સાવ સાચી જણાય છે. માટે ન્યાયદેવતાની સાખે હું તમને આજ્ઞા કરું છું કે, દસ હજાર સોનામહોરોની થાપણ તમારે લક્ષ્મીચંદને સુપરત કરી દેવી. તેમજ ચોરી પર શિરજોરી ગુજારવાના દંડ રૂપે ૩૦ વર્ષનું વ્યાજ પણ ચૂકતે કરવાનો હુકમ કરું છું.
ધનપતિ માટે સમ્રાટનો આ હુકમ શિરોધાર્ય કર્યા વિના છૂટકો થાય એમ જ ન હતો. રડતી આંખે એમણે જ્યારે બનાવટની બાજીનું મંડાણ સભા સમક્ષ ખુલ્લું કર્યું, ત્યારે સૌ બોલી ઊઠ્યા કે, સોનામહોરના સાદે બનાવટની બાજી ઊંધી વાળી,એ આનું નામ !
સંસ્કૃતિની રસધાર ભાગ-૨
