________________
ચારણે ધાર્યું હતું શું અને સૂબા તરફથી પ્રતિભાવ મળ્યો કેવો અને કેટલો બધો આશ્ચર્યકારી ? એથી વાતાવરણે એકાએક જ પુણ્ય-પલટો લેતાં સૌ સ્તબ્ધ બની ગયા. માત્ર ૧૦ રૂપિયાનું દેવું ચૂકતે કરનારા ચારણ વાલા ખીમા કેસરિયાના ચરણે એક લેખ-પત્ર સૂબા વિઠ્ઠલરાવે અહોભાવપૂર્વક સમર્પિત કર્યો. એમાં લખ્યું હતું કે, “ગરણી” નામના ગામને ઉપકારી ચારણનાં ચરણે સમર્પણ કરું છું. અને આ રેશમિયાગામ લેણા રૂપે જે કઈ રકમ રાજીખુશીથી આપે, એમાં સંતોષ માનીને અહીંથી આગળ વધવાનું જાહેર કરું છું. કેમ કે ચારણની જેમ રેશમિયાનું પણ મારે માથે ઋણ ગણાય !
નિઃસ્વાર્થભાવે કરાયેલા ઉપકારના કણને મણ રૂપે પ્રતિફલિત થતાં દર્શાવતા આ ઇતિહાસમાં એ વાત પણ નોંધાયેલી જોવા મળે છે કે, કાઠિયાવાડના બાબરા તાલુકાના ગરણી ગામની ઊપજનો ભોગવટો વર્ષો સુધી ચારણ વાલા ખીમા કેસરિયાના વારસદારો કરતા રહ્યા હતા.
આધાર : નાનાભાઈ હ. જેબલિયા લિખિત પ્રસંગ “વિઠલો”
સંસ્કૃતિની રસધાર ભાગ-૨
૧૦૭
