________________
રાજીખુશીથી સંમત થઈ જતાં આ પછી સૌરાષ્ટ્રના ઇતિહાસમાં જુદી જ રીતે એનાં નામ-કામ અંકિત થવા પામ્યાં.
ઇતિહાસ એમ કહે છે કે, જેને પકડવા અનેક ઈનામો જાહેર થયાં હતાં, છતાં જેને કોઈ ગિરફતાર કરી શક્યું ન હતું, એ મોવર સંઘવાણી સામે ચાલીને માળિયા-સ્ટેટની સમક્ષ શરણાગત તરીકે સમર્પિત બની ગયો. બહારવટિયા તરીકે સમર્પિત થતા મોવર સંઘવાણીના તમામે તમામ ગુના માફ કરી દેવામાં આવ્યા, એટલું જ નહિ, એને સન્માનભેર જમાદાર તરીકેની જવાબદારી સોંપવામાં આવી. ખૂંખાર બહારવટું વિસરી જઈને જમાદાર તરીકેની જવાબદારીનું બરાબર જતન કરવાથી ઇતિહાસાંકિત બની જનારા એના પરિવર્તનનો પાયો રચનારી એની પત્ની બીજઈ પણ ઇતિહાસના પાને અમર બની ગઈ. આવી અમરતા પામનારી નારીઓમાં બીજઈનું નામ મોખરે હોય, એમાં આશ્ચર્ય શું? કારણ કે પતિને પરિવર્તનના પથિક બનાવવા માટે એણે પોતાના જીવનના સુખ-ચેનને સહર્ષ સળગાવી દેવા સુધીની અનેરી જે સજ્જતા દાખવી હતી, એનો તો જોટો જડવો જ મુશ્કેલ હતો.
સંસ્કૃતિની રસધાર ભાગ-૨
