________________
નિરવધિ બન્યો. એમના મનોરથની પૂર્તિ જોકે મોડી મોડી થઈ રહી હતી, પણ એ પૂર્તિમાંથી કોઈ કચાશ શોધી શકે એમ ન હતું. એનો એમને મન અનરાધાર આનંદ હતો.
મેઘાને માટે એ દહાડે વર્ષાઋતુ અને વાદળ વિનાની એ રીતે મહેર-વર્ષા દરબાર આપા કાળા દ્વારા થવા પામી કે, મેઘા માટે એ પછી કોઈ જ વાતે ચિંતા કરવાનું રહ્યું નહિ. એટલું જ નહિ, દરબારે એક તેજીલો તોખાર ઇનામરૂપે એનાયત કરીને, સોરઠી-કલાકાર મેઘા દ્વારા તૈયાર થયેલા શણગારથી જ એને સજ્જ બનાવવા પૂર્વક અશ્વસવાર તરીકે એ જ મેઘાને ઘર ભણી વિદાય આપી. ત્યારે જાણે સોરઠી-કળાના પ્રદર્શન રૂપે એ સ્વાગત યાત્રાને માણીને બીલખા ધન્ય ધન્ય બની ગયું.
મેઘાને અન્યાય કરનારી જે ઘટના બની જવા પામી, એના પરથી બોધપાઠ પામી જનારા દરબારની સાન હવે ઠેકાણે આવી ગઈ. પોતાને અફીણના બંધાણી બનાવવા પાછળનો, અને કોઈ પોતાને મળવા ન આવી શકે, એવો ઘેરો રચવા પાછળની મતલબી માણસોની મેલી મુરાદ કળી જઈને દરબારે એ બધા મતલબીઓને ખખડાવી મૂકીને પાછું સુરાજ્ય પ્રવર્તાવ્યું, આ બધી ફલશ્રુતિ કળા પ્રત્યેની રુચિ અને કલાકાર તરફની કદરદાનીને આભારી નહોતી, આમ કોઈ કહી શકશે ખરું ?
સંસ્કૃતિની રસધાર ભાગ-૨
