________________
સવાલનો સામનો મક્કમતાથ કરતાં જગા પગીએ અને છતી કરીને કહ્યું કે, હું જગો પગી છું, મારી આગળ તમે જાત નહિ જ છુપાવી શકો? મેં તમારા પગલાની છાપ બરાબર ધારી રાખી છે, એ જ છાપ મુંદ્રાના વેપારીની દુકાનની આસપાસ પડેલી જોવા મળી, એથી છાતી ઠોકીને હું કહી શકું છું કે, ચોખાની એ ગૂણના ચોર તમે જ છો. મારે હવે એટલું જ જાણવું છે કે, તમે ચોરી કઈ જાતની ચતુરાઈપૂર્વક કરી શક્યા?
જગા પગીનું નામ સાંભળીને જ જાકલો ચોર સ્તબ્ધ થઈ ગયો. એને થઈ ગયું કે, મારે હવે ચોરી કરવાની ચતુરાઈભરી ચાલ ખુલ્લી કરવી જ પડશે. પણ ચોરીનો આ ભેદ હવે મારે એ રીતે ખુલ્લો પાડવો જોઈએ કે, જેથી મારું જીવતર સુરક્ષિત બની જાય. એણે કહ્યું કે, જગાભાઈ ! એક શરતે ચોરીનો ભેદ ખુલ્લો કરવાની મારી તૈયારી છે. જો મને મહારાવ તરફથી અભય વચન મળતું હોય, તો એમની સમક્ષ આ ચોરી પરનો પડદો ખેંચી લેવાનું વચન પાળવા હું તમારી સમક્ષ બંધાઈ જવા તૈયાર છું.
શરતપૂર્વકની પણ જાકલાની આવી તૈયારી જોઈને જગા પગીનો આનંદ નિરવધિ બન્યો. એને થયું કે, ચોર આટલો ઢીલો પડ્યો છે, તો હવે જંગ જિતાઈ જતાં વાર નહિ જ લાગે, જગો પગી મહારાવ સમક્ષ પહોંચી ગયો. બધી વાત રજૂ કરીને એણે કહ્યું કે, મહારાવ ! બધા જ પ્રશ્નોના જવાબ મળી શકે એમ છે. પણ શરત એક જ છે કે, આપના તરફથી અભયવચન મળવું જોઈએ. બાકી ચોર તો જાકલો જ છે.
મહારાવના મનમાં હવે ચટપટી પેદા થઈ જવા પામી કે, જાકલાએ આ ચોરી કઈ જાતની ચાતુરીપૂર્વક કરી, એ તો મારે જાણવું જ છે. ભલે, એને અભય-વચન આપવું પડે. મહારાવે જગા પગીની શરત સ્વીકારી લેતાં જાકલો મહારાવ સમક્ષ હાજર થયો. મહારાવે એની પીઠ થાબડતાં કહ્યું કે, ચતુર ચોર ! તને અભય-વચન આપું છું. જરાય ભેદભરમ છુપાવ્યા વિના જણાવજે કે, તે ચોરી કરી કઈ રીતે ? સંસ્કૃતિની રસધાર ભાગ-૨
