________________
તેઓશ્રીએ હાજરી આપી હતી. કાઠિયાવાડમાં પણ તેઓશ્રીની પ્રવૃત્તિના પડઘા અમે અનુભવ્યા છે. હવે તેઓશ્રીએ બત્રીસ લક્ષણાની માગણી પુકારી છે. આશા છે આપણે સૌ તેનો જવાબ આપીશું.
શ્રી શિવાભાઈ જે. પટેલ કપાસ સંશોધનક્ષેત્ર અધિકારી પૂ. સંતબાલજી જવાના છે. વિદાય થાય છે, તે વખતે વેદના થાય છે પણ હવે આપણો સંબંધ તેમની સાથે થયો છે, તે આપણે કે તેઓ બેમાંથી કોઈ ભૂલવાનાં નથી. અને તેઓશ્રી ફરી આપણી વચ્ચે પધારશે એવી આશા રાખું છું. તેમના પ્રયત્નોને પરિણામે મને તો દીવા જેવું, ચોખ્ખી રીતે બાપુજીના રચનાત્મક કામનું મહત્ત્વ સમજાઈ ગયું છે.
આ બધું છતાં એક વાત મને ખટકે છે, અને તે એ કે, તેમણે ધરેલી ઝોળી આપણે અધૂરી જ રાખી છે, તેમણે પીરસેલો ખોરાક આપણે પચાવવામાં પૂરા સફળ નીવડયા નથી. અને તેથી તેમની પાસે ભરેલા ભંડારનો પૂરો ઉપયોગ કરી શક્યા નથી મતલબ કે તેમના જ્ઞાનનો જોઈએ તેટલો લાભ લીધો નથી, તેથી તેમની ઝોળીનું મહત્ત્વ સમજ્યા નથી. એટલે આપણે શકિત છતાં ઝોળી ભરી આપી નથી. પણ હવે આશા રાખું છું કે, વરસે બે વરસે આપણે સમજીશું અને બાકી રહેલું કાર્ય પૂરું કરી બતાવીશું.
હરિજનભાઈ શ્રી આલાભાઈની અંજલિ આલાભાઈએ બોલતાં જણાવ્યું હતું કે, બાપુએ અહીં પધારીને અમને યાદ કર્યા છે, એ બદલ ખૂબ આનંદ થાય છે. મને તો કદી કલ્પના ન હતી કે, અમારા સવર્ણ ભાઈઓ અમારી સાથે બેસીને ફળનો કકડો પણ વાપરશે, તેની જગ્યાએ સમૂહભોજન થયું. આ વાતનો મને ખૂબ આનંદ થાય છે. અને હવે વિનંતી કરું છું કે અમારા પ્રત્યે ધ્યાન આપતા રહે અને અમોને શકિત આપતા રહે.
ભાનુભાઈને પણ નવાઈ ! એક જૈન સાધુ આ ગામમાં આવતાંવેત હરિજનોને વારંવાર મળવાની માગણી કરે એ પ્રત્યક્ષ જોઈને મને ખૂબ નવાઈ થયેલી. જ્યારે જ્યારે કચડાયેલા વર્ગની વાત થતી હોય ત્યારે તેઓશ્રી તેમની પ્રત્યે જે મમતાભરી વર્તણૂક રાખે છે, તે જોઈને ઘડો લેવાનું મન થઈ જાય છે.
આ રીતે સ્થાનિક વકતાઓનું મંતવ્ય પત્યા બાદ લત્તા સફાઈ હરીફાઈના વિજેતાઓને, ગ્રામસફાઈ સમિતિના ખાસ કાર્યકરોને અને સ્મરણશકિતના પ્રયાસોમાં વિજેતાઓને ઈનામની વહેંચણી કરવામાં આવી હતી. વિરમગામમાં ચાતુર્માસ
