________________
महाविदेहदेशेषु, जातानां ज्ञानयोगिनाम् । सीमंधरप्रभोः प्राप्ति, -र्जायते न च संशयः ॥१११ ॥
મહાવિદેહ ક્ષેત્રમાં જન્મ ધારણ કરનાર એના જીવનની ઉત્તમ ગતિને પ્રાપ્તિ કરનાર બને છે. જીવનની શ્રેષ્ઠતા એને મળે છે.
જ્ઞાનયોગીઓ માટે તે સુલભ બને છે. વિદેહીજ્ઞાનીઓ જ મહાવિદેહ ક્ષેત્રમાં જન્મ પામે છે. જ્ઞાનદ્રષ્ટિ વડે તે સત્ય સ્થિતિને જોઈ શકે છે.
જ્ઞાનદ્રષ્ટિથી જ્ઞાનયોગીઓ દેહધારી હોવા છતાં વિદેહી છે ને તેથી જ મહાવિદેહ ક્ષેત્રમાં તેમને જન્મ પામવાનું સદ્ભાગ્ય પ્રાપ્ત થયું છે. કર્મના ક્ષયને કારણે તેઓ જ્ઞાનદ્રષ્ટિને સંપ્રાપ્ત થયા છે.
આ કોઈ સરળ વાત નથી. સહજ વાત પણ નથી. જ્ઞાનથી સંસ્કારિત થયેલી દ્રષ્ટિ મેળવવી દુષ્કર કાર્ય છે. જ્ઞાનયોગીઓ તેને પામી શક્યા છે.
વળી તેમનો જન્મ મહાવિદેહ ક્ષેત્રમાં થાય છે, તે પણ કર્મ ક્ષયનો પ્રભાવ છે. પુણ્યાનુબંધી કર્મોના પ્રભાવે કરીને તેઓ જ્ઞાનના અધીક્ષક બન્યા છે.
જ્ઞાનસંપન્ન બન્યા છે. જ્ઞાનને પ્રાપ્ત કરનાર બન્યા છે. જ્ઞાન પ્રાપ્ત થતાં દ્રષ્ટિ વિશાળ જ નહિ, વિશાળતર બનતી જાય છે. વિશાળતમ બને છે. પ્રભુની પ્રાપ્તિ સરળ નથી. પ્રભુનાં દર્શન અતિદુર્લભ છે. અશુભ કર્મબંધને પામેલા જીવાત્મા માટે તે સદૈવ અસંભવિત છે. કર્મક્ષય જરૂરી છે. પુણ્યવંતા કર્મોનો પરિપાક જરૂરી છે. ઉત્તમ ગતિની તરસ જરૂરી છે. ઉન્નતિની પ્યાસ જરૂરી છે.
જેની નજર ઊંચાઈ ભણી છે, તેનાં પગલાં સોપાન શ્રેણીને જરૂર પાદગત કરવાનાં. ઊંચાઈને પ્રાપ્ત થવાનાં.
જ્ઞાનની ઊંચાઈ ગૌરવ અપાવે છે.
મહાવિદેહ ક્ષેત્રમાં જન્મ પામેલા આવા વિદેહભાવવાળા જ્ઞાનીઓ જ સીમંધર પરમાત્માને પ્રાપ્ત કરી શકે છે.
એમાં કોઈ સંશય નથી. તે સિદ્ધ બાબત છે. અટલ પરિણામ છે.
૧ ૨૭
