________________
આત્મભોગની વાત કરે છે જૈનધર્મ. જે સનાતન સત્ય છે. વિશ્વના કલ્યાણ માટે જરૂરી છે પોતાના સ્વાર્થનો ત્યાગ. આત્મભોગ. સમષ્ટિ માટે વ્યક્તિનો ત્યાગ.
આ આત્મભોગથી જ સર્વદેશોમાં જૈનોનું અસ્તિત્વ છે અને એમની વૃદ્ધિ થાય છે.
આત્મભોગ કેન્દ્ર સ્થાને છે. જે જેનો સ્વીકારે છે. જે જગત સ્વીકારે છે. બસ, તે જ જૈનધર્મ છે એમ જાણવું. स्वाध्यायश्च तपः पूजा, साधर्म्यभक्तिहेतवः । सम्यक्त्वं सत्यचारित्रं, जैनधर्मः स उच्यते ॥ २५९ ॥ જૈનધર્મ એટલે શું? જૈનધર્મ કોને કહેવાય?
જૈનધર્મી હોવું એ સાધારણ વાત નથી. અનેક પ્રકારના ઉચ્ચ તત્ત્વોનો સરવાળો એટલે જૈનધર્મ.
જૈનધર્મની વ્યાખ્યા બહુ વિશાળ છે. વિશાળ અને ઊંચી. ઊંચી અને ગહન. જૈનધર્મ ગહનતા અને ઊંચાઈને સ્પર્શે છે. સતત સ્વાધ્યાય. જ્ઞાનના ઊંડાણમાં સતત સરકવું. તત્ત્વજ્ઞાનની ગહનતાને સ્પર્શવી અને એ પણ સતત. તે સ્વાધ્યાય. વળી તપ અને પૂજા. જૈનધર્મ તપના તેજ પર ઊભો છે. જૈનધર્મમાં તપ મહત્ત્વના સ્થાને છે. મનની પરીક્ષા કરે અને આત્મસંયમની કસોટી કરે તેવું તપ. આકરું તપ. સંયમ રંગ્યું તપ. ઉપરાંત પૂજા. . આમ તો દરેક ધર્મમાં પૂજાનું મહત્ત્વ સ્વીકારાયું છે. જૈનધર્મમાં પણ એ નિહિત છે. અનેક પ્રકારની પૂજા જૈનધર્મમાં છે. સાધર્મિક ભક્તિ. પોતાના ધર્મબંધુઓના કલ્યાણ હેતુ કામ કરવું તે. સુખી શ્રાવકો. શ્રીમંત શ્રાવકો. આ બધાનું એક કર્તવ્ય છે. પોતાના સાધર્મિકોની ભક્તિ કરવી તે. એમને સહાય રૂપ બનવું તે.
૨૫૮
