________________
સ્વર્ગની પ્રાપ્તિ થશે અને મુક્તિ મળશે.
‘કૃષ્ણ ગીતા' માં રજુ થયેલો ઉપદેશ બોધગમ્ય, અનન્ય અને સર્વમંગલકારી છે.
તેમાં પ્રતિબોધનાં ઉત્તમ તત્ત્વો સમાયાં છે.
આત્મોન્નતિ કરનાર છે
કૃષ્ણ ગીતા. આત્માનો તેથી પ્રકર્ષ થાય છે. આત્મ વિકાસ સધાય છે.
આત્મામાં પરમાત્મપણું પ્રગટાવનારી છે કૃષ્ણ ગીતા.
કૃષ્ણ વાસુદેવે જગતના કલ્યાણ માટે અને આત્માના મંગળ ઉત્થાન માટે તે કહેલ છે.
મુક્તિ અપાવનાર છે એ.
સ્વર્ગની પ્રાપ્તિ કરાવનાર છે એ.
सर्वमङ्गलमाङ्गल्यं, सर्वकल्याणकारणम् ।
प्रधानं सर्वधर्मेषु, जैनं जयतु शासनम् ॥ ३३१ ॥ જૈન શાસન સદા જયવંતુ છે.
જગતને જૈન શાસને ઉત્તમ તત્ત્વજ્ઞાન આપ્યું છે.
ઉત્તમ ગુણરત્નો જગતના ચરણે ધર્યા છે જૈન શાસને. કરૂણા, દયા, અહિંસા, પ્રેમ અને ક્ષમા.
જેવાં મહાન તત્ત્વો, જે જગતની તમામ સમસ્યાઓની માસ્ટર કી સમાન છે, તે વિશ્વને ભેટ ધર્યા છે. જગતને અર્પણ કર્યા છે.
સૌને સમાવે છે જૈનધર્મ.
ન જાતિનો ભેદ. ન વર્ણનો ભેદ. ન રંગનો ભેદ.
સર્વને સમાવે છે જૈન શાસન. સૌના જીવનને અજવાળે છે જૈનધર્મ. પીડા હરે છે સર્વની. દુઃખ હરે છે સર્વનાં. મંગલ કરે છે સર્વેનું. જે સર્વમંગલોમાં પરમ શ્રેષ્ઠ છે અને સર્વ કલ્યાણનું જે કારણ છે અને સર્વ પ્રકારના ધર્મોમાં મુખ્ય અને શ્રેષ્ઠ છે, એવું જિનશાસન સદા જય પામો.
સર્વત્ર જય પામો. સર્વદા જય પામો.
૩૧૬
