________________
આ જ્ઞાન ન હોય તો અન્ય સર્વ જ્ઞાન વ્યર્થ છે.
દેહમાં વસનાર શક્તિમાન આત્મા જ પ્રભુ છે, એ જ્ઞાન થવું મહત્વનું છે.
આ જ્ઞાન એને થાય છે, જેનું અજ્ઞાન ટળ્યું છે. જેના તમામ ભ્રમો ટળ્યા છે. વિવેકથી ભ્રમ ટળે છે. क्षायिकालब्धयस्तत्र, प्रकाशन्ते स्वभावतः। शुद्धोपयोगसेनानी, रागादिशत्रुनाशकः ॥१२० ॥ શ્રી નેમિનાથ જગપ્રભુ દ્વારિકામાં પધાર્યા છે. એમના આગમનનો હેતુ સુસ્પષ્ટ છે. પ્રભુનું આગમન હંમેશાં જગત માટે કલ્યાણકારી હોય છે.
અજ્ઞાન દૂર કરવા તથા જગતકલ્યાણના શુભ હેતુથી તેમનું આગમન થતું હોય છે. તેમનું દ્વારિકાપુરીમાં જે આગમન થયું છે, તેની પાછળ પણ શુભ કલ્યાણકારી હેતુ રહેલો છે.
દ્વારિકાપુરીના રાજા છે શ્રી કૃષ્ણ વાસુદેવ.
શ્રી કૃષ્ણ વાસુદેવને પ્રતિબોધ પમાડવા માટે તેઓ પધાર્યા છે અને જ્ઞાનના ઉપયોગથી ગૂઢાર્થથી ભરેલી અનેક વાતો તેઓ તેમના પ્રતિબોધના માધ્યમથી કહે છે.
પ્રભુ કહે છે કે -
આત્મામાં ક્ષાયિકભાવની તમામ લબ્ધિઓ સ્વભાવથી પ્રકાશમાન થતી હોય છે.
રાગ આદિ શત્રુઓ માનવીને અંધ બનાવી દે છે. રાગાત્મક ભાવમાં લપસી પડેલો અને મોહના પ્રગાઢ બંધનમાં બંધાયેલો મનુષ્ય અંધકારમાં અટવાતા અંધ સમાન છે.
જીવને રૂંધનારાં ઘણાં બધાં પરિબળો ટાંપીને જ બેઠાં છે.
રાગ દ્વેષ, મોહ માયા, કામ ક્રોધ આદિ અનેક પ્રકારના વૈભાવિક ભાવો મનુષ્યના મોટા શત્રુઓ એના પતનની રાહ જોતા બેઠા હોય છે અને થોડી નબળાઈ નજરે પડતાં જ આ શત્રુઓ તેને પોતાના લપેટમાં લઈ લે છે. પોતાના બંધનમાં જકડી લે છે.
૧૩૭
