________________
(૨૮)
નૂતન વર્ષની પ્રાર્થના તમારા, મારા અને સહુ કોઈના મનમાં એક જ કામના, ભાવના તથા પ્રાર્થના કે નૂતન વર્ષ મંગલમય હો ! સુખમય અને સુખદાયી હો ! સૌનું શુભ થાય ! કોઈનું પણ અશુભ ન થાય ! દેવ, ગુરુ તથા ધર્મનો પ્રભાવ સહુ અનુભવો, અને તે પ્રભાવથી સહુ કોઈ સુખી બનો !
આપણી આજની મંગલ પ્રાર્થના આવી જ હોય એ સ્વાભાવિક છે. પરંતુ એકલી ભાવના કે પ્રાર્થનાથી કાંઈ ન વળે. કર્તવ્યવિહોણી, સંકલ્પ વગરની કે આચરણ વિનાની કોરી ભાવના કે શાબ્દિક પ્રાર્થનાથી ઝાઝો અર્થ ન સરે. ભાવનાને સાર્થક ઠરાવવી હોય તો કર્તવ્ય અદા કરવાની તત્પરતા કેળવવી પડે. પ્રાર્થનાને સફળ બનાવવી હોય તો કંઈક ઠોસ, નક્કર સંકલ્પ કરવો પડે, અને એ સંકલ્પને અમલમાં પણ લાવવો પડે. આપણે આજે તપાસીએ - આપણી જાતને કે આપણે કેવો સંકલ્પ કરી શકીએ તેમ છીએ ? અથવા કોઈ સંકલ્પ કરી શકવા જેટલી તાકાત આપણામાં બચી છે કે નહિ ?
ઘણા લોકોને તમાકુ, ગુટખા, દારૂ, સિગરેટ જેવાં વ્યસનો છોડવાનું કહેવામાં આવે તો તેઓ સ્પષ્ટ ના કહી દે છે. “અમારાથી આવી પ્રતિજ્ઞા, આવું વચન પાળી નહિ શકાય', એમ ઉઘાડેછોગ બોલીને તેઓ પોતાની અશક્તિ જાહેરમાં દર્શાવતા હોય છે. આવું જ બીજી બાબતો માટે પણ હોય છે. ધર્મનું આચરણ કરવાની વાત હોય કે પછી અધર્મનું આચરણ ટાળવાની વાત હોય; ઉભય પ્રકારની બાબતોમાં લોકો પોતાની અશક્તિ જાહેર કરવા સિવાય કાંઈ જ કરી શકતા નથી.
આવા લોકોને પછી ગુસ્સો નહિ કરવાની, ટી.વી.વગેરેથી બચવાની, બીજાને ક્ષમા આપી સંબંધો સુધારવાની વાત કરવામાં આવે, તો તે પણ જચતી નથી; અને તે માટે પણ તેઓ પોતાની અશક્તિ ઝપાટાબંધ જાહેર કરતાં અચકાતા નથી.
જેનાથી, જે કરવાથી કે નહિ કરવાથી, પોતાની જાતનું ભલું થતું હોય, તબિયત બગડતી અટકતી હોય કે જીવન અને સંબંધો સુધરતાં હોય, તેવી કોઈ પણ બાબત માટે જો આપણે સંકલ્પ લેવા તથા આચરણ કરવા તૈયાર ન હોઈએ તો, ઉપર વર્ણવેલી, નવા વરસની પ્રાર્થના શી રીતે ફળશે? કેવી રીતે તે ફળદાયક બનશે? અને જો પ્રાર્થના જ નકામી પડશે, તો પછી આપણા માટે શ્રદ્ધેય-શ્રદ્ધાનો વિષય
૧૩૪.
