________________
“જેમ જેમ સમય વહેશે, તેમ તેમ લોકો વિધર્મીઓની અસરમાં આવીને અહિંસા આદિ ધર્મોથી ભ્રષ્ટ થશે; હિંસાપરાયણ બની જશે.
“ગામડાં મસાણ જેવાં ભાસશે - ખાલીખમ્મ. અને નગરો પ્રેતલોક જેવાં થશે સૂમસામ. ગૃહસ્થો ગુલામ જેવા અને શાસકો યમદંડ-સરખા થશે.
“લોભી શાસકો સેવકોનું ધન લૂંટી લેશે. તો તે સેવકો પ્રજાને લૂંટશે. આમ મત્સ્યગલાગલ ન્યાય પ્રવર્તશે.
“જે છેવાડાના છે તે વચમાં બિરાજશે; અને વચમાં હતા તે છેવાડે ધકેલાઈ જશે. રાષ્ટ્રોનાં રાષ્ટ્રો હાલમડોલમ થશે - સઢ વિનાના વહાણની જેમ.
“પૃથ્વીને - પ્રજાને ચોર લોકો ચોરી-લૂંટીને અને શાસકો કરવેરા દ્વારા કનડશે. અધિકારીઓ લાંચિયા હશે. તે બધાને લીધે લોકોની શ્રેણિઓ – શેરીઓ નિર્જનપ્રાય દીસશે.
“લોકો સત્ય, લજ્જા અને દાક્ષિણ્ય-વિહોણા, પરોપકારવિમુખ, સ્વાર્થપરાયણ અને સ્વજનોના જ વિરોધી બનશે.
શિષ્યો ગુરુની ઉપેક્ષા કરશે, ગુરુઓ પણ શિષ્યોને ઉવેખશે. ગુરુઓ પણ શિષ્યોને શ્રુતજ્ઞાન નહિ શીખવે. આમ, ધીમે ધીમે શિષ્યોનો ગુરુકુલવાસ છૂટી જશે - સ્વચ્છંદ થશે; તેમની ધર્મભાવના મંદ પડી જશે. પૃથ્વી જીવાકુળ - ઘણાં જીવજંતુઓથી વ્યાપ્ત થશે.
દેવો હવે દર્શન નહિ આપે. સંતાનો વડીલોનું અપમાન કરશે. વહુઓ નાગણ જેવી અને સાસુઓ જીવતાં મોત જેવી નીવડશે.
“ખાનદાન ઘરની સ્ત્રીઓ પોતાની આંખોના ઉલાળા, હાંસી, બબડાટ અને ચેનચાળા દ્વારા નિર્લજ્જ અને વેશ્યા જેવી ભાસશે.
“શ્રાવક અને શ્રાવિકા નહિ મળે. ચાર પ્રકારના ધર્મનો હ્રાસ થશે. સાધુસાધ્વીઓને ઉત્તમ પર્વોમાં પણ આહારાદિના ફાંફા પડશે.
ધર્મના ક્ષેત્રમાં પણ લુચ્ચાઈ અને ખોટાં માપતોલ પ્રવર્તશે. સજ્જનો સીદાશે, દુર્જનો લહેર કરશે.
મણિ, મંત્ર, ઔષધો, તંત્ર અને વિજ્ઞાન (કે તંત્ર વિજ્ઞાન), ધન, આયુષ્ય, ફલ-ફૂલના રસો, રૂપ અને શરીરની ઊંચાઈ, ધર્મ અને શુભ પદાર્થો – આ બધાંયની
હાનિ - બધાંના પ્રભાવોનો હ્રાસ થતો જશે. ૧૫ર.
