________________
? જૈનશાસનના જ્યોતિર્ધરો ભાગ-૩
3
જીવદયાની જાગતી જ્યોત
અમદાવાદમાં જેનો વસવાટ છે, એના માટે ‘ઘીકાંટા’ વિસ્તારનું નામ તો અપરિચિત નહિ જ હોય, અને ઘી કાંટામાં વસનારા જૈનો માટે જેસિંગભાઈની વાડી પરિચિત ન હોય એવું બને જ નહિ. જેમના નામના કારણે એ વાડી વિખ્યાત બની જવા પામી, એ જેસિંગભાઈના જીવનના અનેક પ્રસંગોમાંનો જીવદયાની જાગતી જ્યોત સમો એક પ્રસંગ તો ખરેખર જાણવા જેવો છે.
એ અરસામાં વડોદરામાં ગાયકવાડ સરકારનું સામ્રાજ્ય હતું. આગળ-પાછળનો વિચાર કર્યા વિના એમણે એક દહાડો એવો હુકમ જાહેર કરાવ્યો કે, વડોદરા જિલ્લાનાં તમામ ગામોમાં આજ સુધી ગોચર તરીકે જે ભૂમિ ઓળખાય છે અને જેની પર ગામેગામ આજ સુધી તમામ પશુઓ ચરતાં રહ્યાં છે, એ ભૂમિ પર હવેથી માત્ર રાજ્યનાં પશુઓ જ ચરી શકશે. રાજ્ય સિવાયનાં બીજાં પશુઓ માટે આ ગોચરોનાં દ્વાર આજથી બંધ જાહેર કરવામાં આવે છે.
