________________
१९. अगारमावसंता वि आरण्णा वा वि पव्वगा।
इमं दरिसणमावन्ना सव्वदुक्खा विमुच्चती ॥१९॥ २०. तेणावि संधि णच्चा णं न ते धम्मविऊ जणा ।
जे ते उ वाइणो एवं ण ते ओहंतराऽऽहिता ॥२०॥ २१. ते णावि संधि णच्चा णं न ते धम्मविऊ जणा ।
जे ते उ वाइणो एवं ण ते संसारपारगा ॥२१॥ २२. ते णावि संधि णच्चाणं न ते धम्मविऊ जणा।
जे ते उ वाइणो एवं ण ते गब्मस्स पारगा ॥२२॥ २३. ते णावि संधि णच्चा णं न ते धम्मविऊ जणा।
जे ते उ वाइणो एवं ण ते जम्मस्स पारगा ।। २३ ।। २४. ते णावि संधि णच्चा णं न ते धम्मविऊ जणा।
जे ते उ वाइणो एवं न ते दुक्खस्स पारगा ॥२४॥ २५. ते णावि संधि णच्चाणं न ते धम्मविऊ जणा।
जे ते उ वादिणो एवं न ते मारस्स पारगा ॥२५॥ २६. णाणाविहाइं दुक्खाइं अणुभवंति पुणो पुणो ।
संसारचक्कवालम्मि वाहि-मच्चु-जराकुले ॥२६॥ २७. उच्चावयाणि गच्छंता गम्भमेस्संतऽणंतसो।
नायपुत्ते महावीरे एवमाह जिणोत्तमे ॥२७॥त्ति बेमि ॥
॥पढमज्झयणे पढमो उद्देसओ॥
