Agam 03 Thanam Taiam Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 22

[१११] के अयं लोगे?, जीवच्चेव अजीवच्चेव, के अनंता लोगे?, जीवच्चेव अजीवच्चेव के सासया लोगे?, जीवच्चेव अजीवच्चेव ।
[११२] दुविहा बोधी पण्णत्ता तं जहा- नाणबोधी चेव दंसणबोधी चेव, दुविहा बुद्धा पण्णत्ता तं जहा- नाणबुद्धा चेव दंसणबुद्धा चेव, दुविहे मोहे पण्णत्ते तं जहा- नाणमोहे चेव दंसणमोहे चेव, दुविहा मूढा पण्णत्ता तं जहा- नाणमूढा चेव दंसणमूढा चेव ।
[११३] नाणावरणिज्जे कम्मे दुविहे प० तं०- देसणाणावरणिज्जे चेव सव्वनाणावरणिज्जे चेव, दरिसणावरणिज्जे कम्मे एवं चेव, वेयणिज्जे कम्मे दुविहे पण्णत्ते तं जहा - सातावेयणिज्जे चेव असातावेयणिज्जे चेव, मोहणिज्जे कम्मे दुविहे पण्णत्ते तं जहा- दंसणमोहणिज्जे चेव चरित्तमोहणिज्जे चेव, आउ कम्मे दुविहे पण्णत्ते तं जहा- अद्धाउए चेव भवाउए चेव, नामे कम्मे दुविए प० तं० जहासुभनामे चेव असुभनामे चेव, गोत्ते कम्मे दुविहे पण्णत्ते तं जहा उच्चागोते चेव नीयागोते चेव, अंतराइए कम्मे दुविहे प० तं० जहा- पडुप्पण्णविणासिए चेव पिहति य आगामिपहं चेव ।
[११४] दुविहा मुच्छा पण्णत्ता तं जहा पेज्जवत्तिया चेव दोसवत्तिया चेव, पेज्जवत्तिया मुच्छा दुविहा प० तं०- माया चेव लोभे चेव दोसवत्तिया मुच्छा दुविहा पण्णत्ता तं जहा- कोहे चेव माणे
चेव ।
[११५] दुविहा आराहणा प० तं०- धम्मियाराहणा चेव केवलिआराहणा चेव, धम्मियाराहणा दुविहा पण्णत्ता तं जहा- सुयधम्माराहणा चेव चरित्तधम्माराहणा चेव, केवलिआराहणा दुविहा पण्णत्ता तं ठाणं-२, उद्देसो-४
जहा- अंतकिरिया चेव कप्पविमाणोववत्तिया चेव ।
[११६] दो तित्थगरा नीलुप्पलसमा वण्णेणं पण्णत्ता तं जहा- मुणिसुव्वए चेव अरिट्ठनेमी चेव, दो तित्थगरा पियंगुसामा वण्णेणं पण्णत्ता जहा- मल्ली चेव पासे चेव, दो तित्थगरा पउमगोरा वण्णेणं पण्णत्ता तं जहा- पउमप्पहे चेव वासुपुज्जे चेव दो तित्थगरा चंदगोरा वण्णेणं पण्णत्ता तं जहाचंदप्पभे चेव पुप्फदंते चेव ।
[११७] सच्चप्पवायपुव्वस्स णं दुवे वत्थू पण्णत्ता ।
[१९८] पुव्वाभद्दवया नक्खत्ते दुतारे पण्णत्ते, उत्तराभद्दवया नक्खत्ते दुतारे पण्णत्ते, पुव्वफग्गुणी नक्खत्ते दुतारे पण्णत्ते, उत्तराफग्गुणी नक्खत्ते दुतारे पण्णत्ते ।
[११९] अंतो णं मणुस्सखेत्तस्स दो समुद्दा प० तं जहा- लवणे चेव कालोदे चेव ।
[१२०] दो चक्कवट्टी अपरिचत्तकामभोगा कालमासे कालं किच्चा अहेसत्तमा पुढवी अपइट्ठाणे नरए नेरइयत्ताए उववण्णा तं जहा - सुभूमे चेव बंभदत्ते चेव ।
[१२१] असुरिंदवज्जियाणं भवणवसीणं देवाणं उक्कोसेणं देसूणाई दो पलिओवमाइं ठिती पण्णत्ता, सोहम्मे कप्पे देवाणं उक्कोसेणं दो सागरोवमाइं ठिती पण्णत्ता, ईसाणे कप्पे देवाणं उक्कोसेणं सातिरेगाइं दो सागरोवमाइं ठिती प०, सणकुमारे कप्पे देवाणं जहण्णेणं दो सागरोवमाइं ठिती प०, माहिंदे कप्पे देवाणं जहणेणं साइरेगाइं दो सागरोवमाइं ठिती पण्णत्ता ।
[१२२] दोसु कप्पेसु कप्पित्थियाओ प० तं जहा- सोहम्मे चेव ईसाणे चेव । [१२३] दोसु कप्पेसु देवा तेउलेस्सा प० तं जहा- सोहम्मे चेव ईसाणे चेव ।
[ मुनि दीपरत्नसागर संशोधितः ]
[21]
[३-ठाणं]