Agam 03 Thanam Taiam Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 90

अधम्मत्थिकायं आगासत्थिकायं जीवं असरीरपडिबद्धं परमाणपोग्गलं, एयाणि चेव उप्पन्ननाणदंसणधरे अरहा जिणे केवली सव्वभावेणं जाणति पासति तं जहा- धम्मत्थिकायं जाव परमाणपोग्गलं ।
[४८९] अधेलोगे णं पंच अनुत्तरा महतिमहालया महाणिरया पन्नत्ता तं जहा- काले महाकाले रोरूए महारोरूए अप्पतिवाणे, उड्ढलोगे णं पंच अनुत्तरा महतिमहालया महाविमाणा पन्नत्ता तं जहा- विजये वेजयंते जयंते अपराजिते सव्वट्ठसिद्धे ।
[४९०] पंच परिसजाया पन्नत्ता तं जहा-हिरिसत्ते हिरिमणसते चलसत्ते थिरसत्ते उदयणसत्ते ।
[४९१] पंच मच्छा पन्नत्ता तं जहा- अनुसोतचारी पडिसोतचारी अंतचारी मज्झचारी सव्वचारी एवामेव पंच भिक्खागा पन्नत्ता तं जहा- अनुसोतचारी जाव सव्वचारी |
[४९२] पंच वणीमगा पन्नत्ता तं जहा- अतिहिवणीमगे किवणवणीमगे माहण वणीमगे सावणीमगे समणवणीमगे |
[४९३] पंचहिं ठाणेहिं अचेलए पसत्थे भवति तं जहा- अप्पा पडिलेहा, लाघविए पसत्थे, रूवे वेसासिए, तवे अण्ण्णाते, विउले इंदियनिग्गहे ।
[४९४] पंच उक्कला पन्नत्ता तं जहा- दंडुक्कले रज्जुक्कले तेणुक्कले देसुक्कले सव्वुक्कले ।
[४९५] पंच समितीओ पन्नत्ताओ तं जहा- इरियासमिती भासासमिती एसणासमिती आयाणभंड-मत्त-निक्खेवणासमिती उच्चार-पासवण-खेल-सिंधाणजल्ल-पारिठावणिया समिती ।
[४९६] पंचविधा संसारसमावण्णगा जीवा पन्नत्ता तं०- एगिदिया जाव पंचिदिया ।
एगिंदिया पंचगतिया पंचागतिया पन्नत्ता तं जहा- एगिदिए एगिदिएस् उववज्जमाणे एगिदिएहिंतो वा जाव पंचिदिएहिंतो वा उववज्जेज्जा से चेव णं से एगिदिए एगिंदियत्तं विप्पजहमाणे एगिदियत्ताए वा जाव पंचिंदियत्ताए वा गच्छेज्जा बेइंदिया पंचगतिया पंचागतिया एवं चेव एवं जाव पंचिंदिया पंचगतिया पंचागतिया पन्नत्ता तं जहा- पंचिंदिए जाव गच्छेज्जा ।
पंचविधा सव्वजीवा पन्नत्ता तं जहा- कोहकसाई माणकसाई मायाकसाई लोभकसाई अकसाई, अहवा- पंचविधा सव्वजीवा पन्नत्ता तं जहा- नेरइया तिरिक्ख-जोणिया मणुस्सा देवा सिद्धा |
[४९७]अह भंते कल-मसूर-तिल-मुग्ग-मास-निप्फाव-कुलत्थ-आलिसंदग-सतीण-पलिमंथगाणं एतेसि णं धन्नाणं कद्वाउत्ताणं [पल्लाउत्ताणं मंचाउत्ताणं मालउत्ताणं ओलि-त्ताणं लित्ताणं लंहि मुद्दियाणं पिहिताणं] केवइयं कालं जोणी संचिट्ठति? गोयमा! जहण्णेणं अंतोमहत्तं उक्कोसेणं पंच संवच्छराई, तेण परं जोणी पमिलायति तेण परं जोणी पविद्धंसति तेण परं जोणी विद्धंसति तेण परं बीए अबीए भवति तेण परं जोणीवोच्छेदे पन्नत्ते ।
[४९८] पंच संवच्छरा पन्नत्ता तं जहा- नक्खत्तसंवच्छरे जगसंवच्छरे पमाणसंवच्छरे लक्खणसंवच्छरे सणिंचरसंवच्छरे, जुगसंवरच्छरे पंचविहे पन्नत्ते तं जहा- चंदे चंदे अभिवढिते चंदे अभिवढिते चेव । पमाणसंवच्छरे पंचविहे पण्णत्ते तं जहा- नक्खत्ते चंदे उऊ आदिच्चे अभिवढिते । लक्खणसंवच्छरे पंचविहे पण्णत्ते तं जहा:-।
[४९९] समगं नक्खत्ताजोगं जोयंति समगं उद् परिणमंति ।
नच्चण्हं नातिसीतो बहुदओ होति नक्खत्तो ।।
[मुनि दीपरत्नसागर संशोधित:]
[89]
[३-ठाण]