Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 211

१८४
मणोरमा-कहा
इओ य तम्मि चेव नयरे जिणमंदिरे जत्ता महसवो वइ । अण्णोण्णसंबाह-पीडिओ किच्छेण जणो संघरह। अंतरं लहिऊण छिण्णो गंठी वंदएण एगेण। गंठिच्छेएण तक्खणा चेव जाणिओ तेण। कओ कोलाहलो। समागओ सिरिदत्तो समं पुरिसेहिं । वेढियं समंतओ जिणाययणं। पविट्ठो अप्पणा जिण-भवणब्भंतरं । दिट्ठो कयण्हाण-विलेवणो मणिमउड-तिलय-कुंडलकंठय-हार-कंकण-पमुहाभरण-भूसिय-सरीरो, गंधलुद्ध-मिलंत-भूरि-भमरमालो, मालियसरससपत्त-मालाहिं पूइओ विगयराग-दोस-मोह-मच्छरो, पसंत-मुत्ती जिणवरो । संजायबहुमाणो अणिमिसाए दिट्ठीए जिणबिबं निअंतो चित्तलिहिओ व्व जाव अच्छइ तावागओ गहिऊण - सयवत्त-कुसुम-मालं कुंदो नाम मालिओ। चलणेस निवडिऊण समप्पिया तेण माला । गहिया सिरिदत्तेण--"अहो ! धण्णो हं जस्स चितियमेत्तो चेव पूया संपण्णा । उयणिज्जो य एस भयवं । एवं पवडढमाणसह-परिणामेण समारोविया माला जिणिदस्स सिरिदत्तेण पलोइया सइरं । पणओ जिणिंद-पय-कमले । एत्थंतरे कओ आउय-बंधो । नीहरिउमारतो विण्णत्तो कुंदेण--"एस गंठिच्छेय-तक्करो आबाल-भावाओ चेव ज्यवसणा[स]त्तओ तमलो नाम मह सुओ। काउण पसायं तहा कीरउ जहा मुच्चइ इमाओ मरण-वसणाओ।
एत्थंतरे भणिओ सिरिदत्तो निय-पुरिसेहि--"सामि ! जीवग्गाहं गहिओ सो तक्करो। संपयं किं कीरइ ?" तेण भणियं-“मह समीवं आणेह"। आणिओ य भणिओ सिरिदत्तण--"अणुहवसु संपयं कुकम्म-समायरण-फलं।" भणिया पुरिसा--"खणमेगं वियणं करेह जेण चड्डेमि एयं ।” गया पुरिसा । भणिओ कुंदो सिरिदत्तेण--"अहो! समययासंपायणेण परमोवयारी मह तुमं अओ संपाडेमि ते समीहियं । परं पयड-मोयणे राय-सासणाइक्कमो हवइ । अओ पच्छण्णं पच्छिम-दुवारेण निग्गच्छउ एस । तहेव कयं । खणंतराओ 'एस गच्छइ एस गच्छइ तक्करो' त्ति को कोलाहलो समागया पुरिसा। इओ तओ पहाविया न दिट्ठी कत्थ वि तक्करो। गओ निकेयणं सिरिदत्तो। वोलीणो वासरो। समागया रयणी । हिडिऊण पहरमेगं नयरमज्झे आगंतूण नियघरं नुवण्णो पज्जलियपईवे वासभवणपल्लंके। समागया निद्दा । दिट्ठो य पुव्ववेरिय-भुयंगमेण । पज्जलियकोवानलेण डक्को पट्ठि-पएसे । ‘डक्को डक्को' त्ति उच्छलिओ कोलाहलो। मिलिया सुहिया सयणाइया। समाया तेहिं गारुडिया। न जाओ को वि विसेसो। पेच्छंताणं चेव उवरओ सिरिदत्तो। मरिऊण समुप्पण्णो तम्मि चेव नयरे विलासराइणो रईसुंदरीए देवीए कुच्छिसि पुत्तत्ताए। दिट्ठो तीए चेव रयणीए सुमिणगम्मि मालइकुसुम]मालाए कओ नियसिरे सेहरो । तक्खणा चेव गंतूण साहिओ दइ[अ]स्स तेण वि समासासिया पुत्तजम्म-लभेण। सुहं सुहेण गल्भं वहमाणीए वोलीणा नव मासा अट्ठमा राइंदिया। तओ सुहवासरे पडिपुण्णचोदसीए सुहगह-निरिक्खिए लग्गे पसूया रइसुन्दरी[ए] सुकुमाल-पाणि-पायं दारयं । कारिओ राइणा महामहूसवो। मासावसाणे पट्टावियं नाम सुमिण-दसणाणुसारेण कुसुमसेहरो त्ति। कमेण जाओ अट्ठवारिसिओ। समप्पिओ लेहायरियस्स अचिरादेव जाओ सव्वकलावियक्खणो । संपूइऊण विसज्जिओ उवज्झाओ । महया पयत्तेण लालिज्जमाणों पत्तो सयलजणसलाहणिज्ज जोव्वणं ।
- इओ य विजयखेड-नयरे जयमंगलराइणो जयसुंदरी नाम दारिया पत्त-जोव्वणा वरिज्जमाणी संजायाणुरागेण वंतरेण वारिया मह परिग्गहे एमा न कस्स वि। समाहूया अणेगे मंत-तंत-वियाणया । नोवसामिओ केणा वि वंतरो। सुओ एस वृत्तंतो कण्ण-परंपराए कुसुमसेहरेण । समुप्पण्णकोऊहलेण देस-दसणनिमित्तं विण्णत्तो जणओ । हरिसवसविसप्पमाण-माणसेण समणण्णाओ तेण चउरंग-बल-समेओ निग्गओ कुसुमसेहरकुमारो । कमेण पडिच्छंतो गामागरनगरेसु विणयावणय-जणपणाम, मागहजण-जणिय-जयजयाराव-बहिरिय-दियंतरो, दियंतरविसप्पंत-कित्ति-पब्भार-भरियभंडलोयमंडलं निभालितो, पत्तो सूवेल-पव्वय-समासण्णदेसं । रम्मयाए पएसस्स कारियमप्पयाणकं कइवयसहायपहिओ हत्थि-खंधमारुढो पन्वय-नियंब-समासण्णगिरिसरियापरिसरेसु परियडिउमारद्धो । कोऊहलाउरिज्जमाणमाणसो उत्तिण्णो करिवराओ। इओ तओ निभालयंतो पत्तो एगं वंस-कुडिगि । दिट्ठो तत्थेगो अग्गिकुंड-समासण्णोवविट्ठो ईसि फुरंतउट्ठउडो अंतरंतरादीहदीहे हुंकारे मुयंतो अपक्कबिल्लेहिं अग्गि हुणंतो मंत-साहणुज्जुओ एगो जोगिओ। गओ तस्स समीवे कुसुमसेहरो।