Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 327

३००
मणोरमा-कहा
लेण भणियं--"जं भयवं समाणवेइ ।" ठाणे विज्जाविणिओगेण कयत्थमत्ताणयं मण्णमाणो समाहाणेण मओ अरिहभहो। पिंगलगो गुरुकम्मआए लंघिऊण गुरुवयणं, वाहिऊण लोयववहारं, अगणिऊण भिक्खुसमायारं, विसयसुहसाहणत्थं विज्जाओ पउंजिउमारद्धो। वसीकरणमंतसामत्थेण समागच्छंति इच्छियरमणीओ । सो वि दुज्जया मोहस्स, अहिलसणीययाए विसयाणं, वियारकुलहरयाए जोव्वणस्स, अणवेक्खिऊण नियभूमियं, अणालोइ [उ] कज्जाकज्जं, अकज्जं ताहि समं काऊमारद्धो । रयणीए जो चोरियं करेइ कह वि को वि जाणइ तो नहंगणे नहगामिणिविज्जासामत्थेण गच्छइ । दिवसओ धम्मियजणायारदसणेण मुद्धजणं विप्पयारेइ ।
अण्णम्मि दिणे पभायसमए गंतूण निसण्णो तलायपालीए। वसीकरणमंतसुमरणचलंतोट्ठसंपुडो, कप्पूर-कत्थूरिय-कयंगरागनिस्सरंतपरमपरिमलवासियदियंतरो जाव चिट्ठइ खणंतरं, ताव समंतओ वेढ़िओ जलनिमित्तमागयाहिं, ससिंगारवयणपयडियकामवियाराहि, कंपंताहरलूसंतकडिल्लनीवीहि, संभमुन्भंतलोयणाहिं, मयणवसविसंठुलखलंतमहरवयणाहि, नयरतरुणीहि । सपरिहासं जंपियमिमाहि--"भयवं ! कीस तुमं तरुणगो चेव संसारसुहसंदोहसारभूयं, जम्मतरे वि तवसिजणेण पत्थणिज्ज, हरिहरपियामहपमुहतियसविसर-सेवियं विसयसुहमुज्झिऊण दोहग्गदमियवडढजणाइसेवणिज्जं पव्वज्ज पवण्णोसि?" सोऊण कामकदलीकंदकप्पाणि ताण वयणाणि परिहास जंपियं पिंगलेण--"भोईओ पिययमापरिभवो चेव पव्वज्जाए कारणं ।" ताहि भणियं-"अहण्णा सा वराई। अजोग्गातुह चलणाराहणस्स? अलं तीए पावाए। आणानिद्देसकारी एस ते जणो निस्संकं वावारेयव्वो भवया सयलकज्जेसु ।" ईसि हसिऊण जंपियं पिंगलेण--"एवं भवउ।" एत्तरे नियपओयणवसागएण दंडवासिएण दिट्ठो रमणीहि सह सरागमुल्लवंतो वेसविरुद्धायारो। 'एस न सोहणो' त्ति संपहारिऊण गओ तलवरो। कहिओ तेण अमच्चस्स जहा-"रत्तवडवेसधारी महाभुयंगमसमायारो तुम्ह पुरे एगो पुरिसो परिवसइ। अमच्चेण भणियं--"गाढं विमाणिऊण मारेह ।
___ अण्णम्मि दिणे अणायारकारित्ति मुक्को विज्जाहिं पिंगलो। गहिओ दंडवासिएण विडंबिऊण विविह-विडंबणाहिं नीओ मसाणं। समारोविओ सूलीए। कंठगयपाणो दिट्ठो साहुसंघाडएण । कया धम्मदेसणा। दिण्णा महु-मज्ज-मसपंचुंबरिपभिई नियमा। कहियं देवगुरुतत्तं । दिण्णो पंचपरमेट्ठी नवकारो। मरिऊण तप्पभावेण समुप्पण्णो ते जेठभाया कुरुदत्तो पुव्वभववासणावसेण मायावी, अत्थलोलुओ, परदाराभिलासी, दुग्गइपुरपाहुडं । पाविऊण माउलगाओ दंडरयणं तुह रंजणत्थं मायाए काऊण देसावगासियं, दंडमाहप्पेण अदिसमाणमुत्ती, रयणीए भंजिऊण बीयं सिक्खावयं, परदारेसु अभिरमइ चोरियं च करेइ । एवं च तेण बद्धं घणचिक्कणं कम्म । मालाओ निवडणेण मरणं तुज्झ वि पच्चक्खं चेव । नरयाओ उव्वट्टो भमिऊण दीहसंसारं चिरेण परमपयसाहगो भविस्सइ"त्ति। एवं सोऊण संजाओ कुरुदेवस्स भव-निव्वेओ। वंदिऊण केवली समागओ नियमंदिरं। सविसेसाणुट्ठाणं कुणमाणो, निरइयारं देसविरइवयं पालिऊण कयसरीरसंलेहणो, अणसणविहिणा चइऊण पूइ-कडेवरं, समुप्पण्णो सणंकुमारो देवकुमारो। तओ चुओ महाविदेहे रायसिरि भोत्तूण विहिविहियपव्वज्जो खीणकम्मंसो वि सिद्धि-सुहभायणं भविस्सइ। देसावगासियमिणं काऊण न पालयंति जे पुरिसा। ते वह-बंधण-ताडण-मरणाइं इहेव पाविति ।।५५५।। परलोए नरयगई-तिरियगई वा वि दारुणा तेसि। भठ्ठपइण्णाण तओ दुलहा सद्धम्म-संपत्ती ।।५५६।। देसावगासियरया जे पुरिसा ताण सोगई सुलहा । इह लोगे वि पसंसा पडिवण्णं पालयंताण ।।५५७॥ बीयं सिक्खावयं
तइयं सिक्खावयं पुण पोसहोववासो, सो पुण चउब्विहो--आहारपोसहो, सरीरसक्कारपोसहो, बंभचेरपोसहो, अव्वावारपोसहो य । अट्ठमिचाउद्दसि-उद्दिट्ठ-पुण्णमासिणी ससमयपसिद्धासु पुण्णतीहिसु सवओ देसओ वा कीरए । तत्थ सव्व]ओ अहोरत्तं जाव असणाइचउविहाहारपुरिवज्जणं सव्वहाण्हाणुव्वटणाइसरीरसक्कारपरिहारो। बंभचेरपोसहो अहोरत्तं जाव सव्वहा बंभचेरपरिपालणं । अव्वावारपोसहो-अहोरत्तं सावज्जवावारपरिहाररूवो । देसओ पुण