Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 325

२९८
मणोरमा-कहा
देवेण भणियं-"किमज्ज वि विग्धं भविस्सइ?" भगवया भणियं--"पडिहयपहावा संपयं सा।" एयं सोऊण संवेगमावण्णा परिसा जहारिहं काऊण धम्मपडिवत्ति गया सट्ठाणं । दुग्गदेवो वि सयलसहा-समक्खं उववूहिओ गुरुहि, कयत्वमत्ताणयं मण्णतो बंदिऊण सपरिवारं गरुपायपंकयं गओ नियमंदिरं। पवढमाणसुहपरिणामो परिपालिऊण जहागहिय सामाइयसिक्खावयं मरिऊण समाहिमरणेण समुप्पण्णो सणंकुमारकप्पे उक्कोस-ठिई सुरवरो । तओ चुओ निव्वाणं गमिस्सइ । ता भो देवाणुप्पिया।
जो निच्चलचित्तेणं अंतमहत्तं पि कुणइ सामाइयं । सो पावेई परमसुहं इह लोगे तय परलोगे ।५५३ । सामाइए पसं कुणंति न कुणंति अपणो चेव । काऊण विराहं चिय दो वि भवा निष्फला ताण ।५५४। पढमं सिक्खावयं ।
बीयं सिक्खावयं नाम जं दिसिवयगहियस्स दिसापरिणामस्स पइदिवसं पइ-पहरं थोव-थोवतरावगासे ठावणं एयं पि देसावगासियं । उवलक्खणमेयं । तेण सव्वेसु वि थूलपाणाइवायविरइपभिई सुपच्चक्खाणे सु णिच्चमेव थोवथोवतरागे अवगासे ठावणं । एवं देसावगासियं भण्णइ। संपयं एयस्स चेव आराहगविराहगा भण्णंति ।।
अत्थि एत्थेव जंबुद्दीवे अवरविदेहे खेते धणवइसमविभवबहुजणकयसंवासं परचक्काणक्कंतपायारपरिवेढियं पुरंदरंपुरसंकासं संकासं नाम नयरं। तम्मि य कुरुदत्तकुरुदेवाभिहाणा सहोयरा दो वि वणियदारया परिवसंति। संते वि पुव्वपुरिसज्जिए दविणजाए जं जं परस्स पेच्छइ तं तं अण्णो वि अहिलसइ कुरुदत्तो। कुरुदेवो पूण नियविहवसंतुट्ठो कालं गमेइ ।
अण्णया समागओ पाहुणगो महिंदपालो नाम ताण मामगो। कया ण्हाण-भोयणाइया पडिवत्ती। विसिट्ठ संकहाए वोलीणो वासरो। समागया रयणी । सपरिवारा समं जणणीए निसण्णा महिदपालसमीवे कुरुदत्तकुरुदेवा। समाढत्ता गोट्ठी। पच्छा पेच्छंताणं चेव बिज्जुज्जोओ व्व दिट्ठनहो जाओ महिंदपालो । संखुद्धो सव्वो वि सयणवग्गो। लग्गो इओ तओ निरूविउं। अदिस्समाणे तम्मि पयट्रो अक्कंदो। खणंतरेण पयडिओ तेण अप्पा। हरिसविसायगम्भिणं तं पलोइउं पवत्ता कुरुदत्ताइणो । ईसि हसिऊण जंपियं महिंदपालेण--"वच्छा ! अलं संभमेण?" कुरुदत्तेण भणियं--"माउलग ! को एस वइयरो ?" तेण भणियं--"सुणसु । कयाइ वाणिज्जेण गओ हं उज्जेणीए। कय विक्कयं कुणंतो ठिओ मासतियं, जाओ इट्ठायारो सह जोगिएण। उवयरिओ सो मए निच्चं दाण-विणएहि ।
अण्णम्मि दिणे पसण्णमाणसेण भणियं तेण--“भो महिंदपाल ! रंजिओ हं तुह विणएण जोग्गो य तुम । अत्थि य मे भयवया खंददेवजोईसरेण दिण्णं दंडरयणं । इमिणा करगएण देवावि न पस्संति किमंग पुण चक्खुणो । ता तुमं गिण्ह एवं दंडरयणं विज्जा समज्जियं ।" मए भणियं--"जं भयवं आणवेइ" ति गहियं । तप्पभावेणं पओयणवसेण अद्दिस्सो हैं हवामि ।' कुरुदत्तेण भणियं--"माउल ! देहि मे एयं दंडरयणं ।" तेण भणियं--"एगं रयणि मसाणे मंतजावो कायव्वो। सत्तमवलंबिऊण उवसग्गा सहेयव्वा । तओ सिज्झइ सा दंड-विज्जा। सिद्धाए वि संतुट्ठमाणसेहि गहियनियमविसेसेसु दढव्वएहि होयब्वं । अण्णहा अणत्थो। 'जं भणसि तं सव्वं समायरिस्सामि ।' दिण्णा विज्जा। गहिया कुरुदत्तेण । महिंदपालेण भणिओ कुरुदेवो--"वच्छ ! तुम पि गिण्हाहि ।” तेण भणियं-"न मे कज्जं कोउगेहिं।" काऊण बलिविहाणं, अत्थमिए दिणयरे, वियंभिए तमंधयारे, किलिकिलियासु डाइणीसु, मसाणमज्झे परियडतेसु निसायरेसु, कण्णकडुयरं रडतेसु घुयडेसु. घेत्तूण मंडल-पूओवगरणं, समं कुरुदत्तेण पत्तो मसाणं महिंदपालो। आलिहियमणेण तत्थेगदेसे मंडलं । निवेसिओ तत्थ कुरुदत्तो। जालिओ जलणो। भणिओ कुरुदत्तो--"गिण्हाहि एवं अट्ठोत्तरसयं गुडियाणं । आउलमाणसो मंतं जविऊण एत्थेक्कं जलणे पक्खिवाहि । अट्ठोत्तरिमवेलाए निहरिस्सइ अग्गिकुंडाओ एगा कण्णगा। सहत्थेण दंडरयणं समप्पिस्सइ । पारद्धो मंतजावो । कुरुदत्तेण सहिया धरणिकंपादओ उवसग्गा। मंते जविज्जते दिट्ठा अग्गिकुंडाओ नियगरुय-नियंब-पब्भार-बहण-किलंतोरु-जुयल-मंथरगमणा, अहिणवुब्भिण्ण-कठिणथण-रायंत-वच्छत्थला, पडिपुण्ण-पुण्णिमायंद-संपुण्ण-वयण-कमला, नीलुप्पलदल-विसाल-सरल-सिणिद्ध-पम्हल-चारुलोयणा, पारिपाय