Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 365

३३८
मणोरमा-कहा
एयं सोऊण संजायसंवेगो काऊण चरण-पडिवत्ति, वंदिऊण आयरियाणं पयपंकयं, मणोरमा पमुह-परियणपरिवारिओ, पविट्ठो नयरं सूरसेणनराहिवो । साहिओ सामंताण निययाभिप्पाओ । बहुमण्णिओ एयाण । तओ अकयकालक्खेवं वज्जंताणं वज्जाणं जयसद्दभरियभुवणोदरा पारद्धा जिणाययणेसु अट्ठाहिया । मोयाविया कारागारगया सव्वे वि दुहियजंतुणो। घोसाविया अदिणाणि जाव सव्वत्थदाहिणसेणीए अमारी। अहिसित्तो रज्जम्मि महामहसवे मणोरमसेणो । पणओ अप्पणा समं मंतिसामंतेहि। तओ तेणाणण्णाओ समारूढो पूरिससहस्सवाहिणि सिबियं । परिवारिओ पविठो तक्खणचेव निक्खमणाभिमहविजयसेणेण विज्जाहरसहस्सेण य। मणोरमा वि रईसंदरीविजयावली हेमसंदरी पमुहविज्जाहरसुदरी समूहसंपरिवुडा, धरिज्जमाणी वि मणोरमसेणराइणा, बीय-सिबियाए समारुहिऊण समागया रायसमीवं।
तओ वज्जतपउरतूरनिनायभरियभवणभंतरो, मागहजणजणियजयजयारवो, मंगल-विज्जाहरसुंदरीसंदोहसंरुद्धरायमग्गो, उप्पयंतनिवयंताणेगविज्जाहरपूरियनहंगणो, कलकंठकंठगिज्जंतगुणगणो, तरुणतरुणीनट्टनट्टियाक्खितमिलंतविडजणजणियकोलाहलबहिरियसंवणंतरो, अहो! धण्णो, अहो ! कयत्थो, अहो ! सुलद्धजम्मजीवियफलो' इच्चाइ बहुजणवयणनिसामंतो, “एस आगच्छइ' एवं पयंपिरपउरजणंगुलिसहस्सेहिं दाविज्जमाणो कुवलयंघरगवखरोहिअपुरंगणाहि नयणमालासहस्सेहि पलोइज्जमाणो, समं मणोरमाए निग्गओ नयराओ नराहिवो । पत्तो जयभूसणमज्जाणं। उत्तिण्णो सिवियाओ समं मणोरमाए । गओ जयसुंदरायरियपायंतिए । काऊण तिपयाहिणं वंदिया सूरिणो। विणयविहियकरयलंजलीपूरओ होऊण एवं भणिउमाढत्तो-"आलित्ते णं भंते लोए। पलिते णं भंते लोए जरामरणेण य । अओ संसार-भउब्विग्गे सारीरमाणसागंगदुक्खजलणजालावली पलित्तसंसारपलीवणयाओ नीहरिउ-कामो पव्वयामि देवाणुप्पियाणं अंतिए।" सूरिणा भणियं--"अविग्धं देवाणुप्पिया ! मा पडिबंधं करेह ।" तओ गंतूण ईसाणे कोणे मुक्काणि वत्थाहरणाणि । अंसुजलं मयमाणेण पडिच्छियाणि मणोरमसेणेण । तओ नियपरिवार-सहियाणि आगमविहाणेण दिक्खियाणि । सूरिणा समप्पिया मणोरमा सपरिवारा सुहंकराभिहाणाए पवित्तिणीए। वंदिऊण सूरि गओ सट्ठाणं मणोरमसेणो। तेहिं वि गहिया दुविह-सिक्खा । पढियाणि सूरसेणसाहुणा चोद्दसपुव्वाणि जाओ गीयत्थो । निवेसिओ नियपए सूरिहि । मणोरमाए वि पढियाणि एक्कारसंगाणि जाया गीयत्था ठाविया पवत्तिणि पए। तओ सूरसेणजाया सूरि मणोरमा पवत्तिणी य विहरिऊण उग्गविहारेण महिमंडलं, काऊण भव्वसत्ताण सण्णाणाइरयणवियरणेण परमोवयारं, सुहज्झाणानलनिद्दड्ढघणघाइकम्मिधणाणि, उप्पाडिऊण लोयपयासकरणपच्चलं केवलवरनाणदंसणं, विहरिऊण केवइ कालं केवलिपरियाएण, नाऊण समयं, काऊण जोगनिरोह, समारुहिऊण सेलेसि, असेसकम्मंसविप्पमुक्काणि परमाणंदसासयसुहसमद्धासियं परमपयं पत्ताणि ।।
सिरि वद्धमाणसूरीहि विरइयाए मणोरमाकहाए मोक्खफलविरइलाहावसरो, तुरिओ परिसमत्तो ।। संपइ कहा समप्पइ सुबोहसद्देहि विरइया एसा। यंभणयकयनिवासो पासो मह मंगलं कुणउ । १२१०। छंदाणुवित्ति-रहिया निरलंकारा सुवग्णयविमुक्का । दुग्गयगामीणसुय व्व मह कहालक्खणविहुणा ।१२११। तह वि सुयणेहि गहिया सरल-सहावेहिं दोस-विमहेहिं । एसा वि विराइस्सइ दुग्गयदुहिय [व] ठाणगया ।१२१२। आसि जयपायडजसो सीसो सिरिवद्धमाण-सामिस्स । पंचमगणहरदेवो चोद्दसपुव्वी सुहम्मो त्ति ।१२१३। तस्स य सीसो जंबू तओ वि पभवो पहाणगुणपभवो। मणगपिया परमरिसी तत्तो सेज्जभवो भयवं ।१२१४। एवं सूरीण परंपराए ता जाव अज्जवइरो ति। साहाए तस्स विमले चंदकुले चंदसमलेसो ।१२१५। अप्पडिबद्धविहारो सूरी सोमो व जणमणानंदो । आसि सिरिवद्धमाणो पवड्ढमाणो गुणगणेहिं ।१२१६। सूरिजिणेसर-सिरिबुद्धिसागरा सागर व्व गंभीरा । सुरगरुसुक्कसरिच्छा सहोयरा तस्स दो सीसा ।१२१७। वायरण-छंद-निग्घंटु-तक-नाडय-कहाइया बहवे । विबहजणजणियहरिसा जाण पबंधा पढिज्जति ।१२१८।
www.jainelibrary.org.