Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 226

सम्मत्तलभो णाम बीओ अवसरो तत्थ य विज्जुसेहरकहा
१९९ खणंतरेण वयंस वलियग्गीवं सिणिद्धवंगदिट्ठी-दोरेण । पुणो पुणो मे हिययं आकड्ढंतीव अंतरिया कइवयवणेहिं ।
तओ पयट्टा सरीरे अंगभंगा, वियंभिया दीहुण्हा नीसास उस्सासा । गओ मुद्दारयणमिसेण तमेव-लयाहरयं । जत्थ सा दिट्ठा तविरहविहुराणि अंगाणि संवाहेउमचयंतो नुवण्णो सुद्धधरणीतले । किं बहुणा। संपयं पि भट्टट्ठियचणगो व्व न सयणीए वि रइं लभामि । एत्यंतरे समागओ सुंदरो । इसि हसिऊण जंपियमणेण--"अहो सच्चा संजाया मे केवलिया।" मेहरहेण भणियं-"भो न एस कालो केलीए विसमदसा समावण्णो पियवयंसो चितेसु किंचि उवायं जेण समीहियं होइ । सुंदरेण भणियं-पाहुणगा तुब्भे । चिट्ठह इह निच्चिता । मह चेव एसा चिता । जब एयं पओयणं न साहेमि तो हुयवहं पविसामि।" विज्जुसेहरेण भणियं--"अहो भे भणिइनिउणत्तणं--" परिणामसुहाई सुपेसलाई जणहि[य]य निव्वुई कराई। विरला जाणंति जणा पत्थावे जंपियव्वाइं ।।२९९।।
गओ सुंदरो समासासिओ विज्जुसेहरो। जओ-- दव्वावहारजणियं पियजणविरहुब्भवं दुरहियासं । अइ गरुयं पिहु दुक्खं आसाबंधो सहावेइ।। ३००।।
तओ आरब्भ पारद्धा पाणभोयणाईया सरीरठिइविज्जुसेहरेण । भवंति परोप्परं संलावा सुंदर- जयमंगलाण। एवं च वच्चंतेसु दिणेसु अण्णम्मि दिवसे वोलीणो रयणिपढमपहरे मियंक-कर-नियर-करंबिए जीवलोए निग्गओ रयणसेहरमंदिराओ बद्धावणयतूरसहो । संकियहियएण पुच्छिओ विज्जुसेहरेण मेहरहो। तेण भणियं--"अहं पि न सम्म वियाणामि ।" एत्थंतरे विवण्णवयणो अहोमहलोयणो समागओ संदरो । पुच्छिओ मेहरहेण- “वयंस! विच्छायवयणो विय लक्खीयसि ?" तेण भणियं-“भाउय ! जीविए वि णे संसओ। चिट्ठउ ताव विच्छायवयणया।" जओ-दिणावसाणे रविकरा इव अत्थमिया मे मणोरहा जीवियासा य ।" मेहरहेण भणियं----"कहं ?" तेण भणियं-"कण्णकडुयंपि पुच्छंतस्स तुह कहिज्जइ। वद्धावणयतूर-रव-सवण-संकिय-माणसो गओ हं रायमंदिर-दुवारं। बहुजण-संवाह-दुस्संचारत्तणओ पविसिउमचयंतो ठिओ तत्थेव खणमेगं । दिट्ठा य नीहरंती ससोगा जयमंगला रायमंदिराओ । सा वि में दठूण बाहजल-भरिय-लोयणा मन्नब्भर-भरियमाणसा खलंतक्खरं जंपिउमारद्धा-“भो सुंदर ! पेच्छह हयविहिणो विलसियं । संघडण-विहडणुज्जुओ एस हयासो । निष्फलो जाओ सव्वो वि मे पयासो। जओ-- अण्णह परिचितिज्जइ सहरिसकंडुज्जुएण हियए ण। परिणमइ अण्णहच्चिय कज्जारंभो विहिवसेण ।।३०१।।
तओ मए भणियं--"कज्ज भणउ भोई । किं बहुणा निरत्थयविलावेण ?" तीए भणियं-"जइ एवं तो सुणसु । अत्थेत्थ उत्तरसेणिसंठिय-सयल-विज्जाहर-नियर-नमणिज्जो सुविभत्त-तिय-चउक्क-चच्चर-उज्जाणारामरमणीयविसालसाल-सक्किदण-पुरवर-सरिच्छं चंपासंदर-पमह-पहाण-बहनयर-सामिओ, कमल-दलविसाललोयणो पडिपुण्णपुण्णिमा चंदो व्व आणंदयरो जणलोयणाणं, सूरो व्व अखंडियपयावो, दप्पिटुवइरि-वारण-विक्कमो, अक्कंतानामंत-सामंतमंडलो सूरसेणो नाम विज्जाहराहिवो । नेमित्तिय-वयण-संचोइएण नियसुयसूरतेय-निमित्तं पेसिया नियपुरिसा कणयमंजरीए वरणत्थं । दिण्णा अणुग्गहं मण्णमाणेण रणसेहरराइणा। पारद्धो वरणमहसवो। समाहूया संवच्छरिया। निरूवियं लग्गं । इओ दिवसाओ दसमदिवसे दसमीए सोमेण पाणिग्गहणं भविस्सइ । अओ एस वद्धावणयं तूर-निग्घोसो। एयं सुणिऊण मुच्छानिमीलियच्छी पडिओ पल्लंकाओ धरणीए विज्जसेहरो । सित्तो सिरि-खंड-जलेण । पविजिओ तालविटेण । संबाहियाणि मेहरहेण सव्वंगाणि । खणंतरेण लद्धचेयणो विलविउमारद्धो-- दसणमेत्तेण वि वड्ढिऊण नेहं हयास रे दिव्व ! अन्नत्थ तं मच्छि जोडितो किण्ण लज्जिहसि ।।३०२।। नयणाण पडउ वज्जं अहवा वज्जाउ समहियं कि पि । अमुणियजणे वि दि8 अणुबंधं जाणि कुव्वंति ।३०३।