Manorama Kaha

Author(s): Vardhmansuri, Rupendrakumar Pagariya
Publisher: L D Indology Ahmedabad

Page 322

तइयअवसरे सामाइयसिक्खावपये नरदेवदग्गदेवकहा
२९५
किंचभोग-विवज्जिय फलरहिय, भू-भारंकुर भग्ग । खलसिरि दुहव-महिल जिंव, अंगि न कस्सइ लग्ग ।।५३७।।
एवं भणिऊण समप्पियं ववहारमेत्तं धणगुत्तेण दविणजायं। ववहरइ तेण।
अण्णया किलेससंपाइयपाणवित्ती वय-विराहण-दोसदूसिओ रुद्दझाणोवगओ मरिऊण समुप्पण्णो पढमपुढवीए मज्झिमाऊ नारओ। धणगुत्तो वि अखंडं परिपालिऊण अणत्थदंडविरइवयं समाहिमरणेण मरिऊण समुप्पण्णो बंभलोए सुरवरो। तओ चुओ नेव्वाणं महाविदेहे लभिस्सइ। जेऽणत्थदंडविरई कुणंति ते सोक्खभायणं होंति । इहलोए, परलोए परपीडं परिहरंति जओ।।५३८।। जे पुण अणत्थदंडे मण-वइ-काएहिं संपयट्टति । ते इहभवे वि दुहिया अण्णभवे दोग्गई तेसि ।।५३९।। तइयं गुणव्वयं ॥
पडिवण्णाणुव्वयगुणव्वयं पुण सावगेण सिक्खावयाणि पडिवज्जियव्वाणि। [ते वि] पुण चत्तारि। तं जहासामाइयं देसावगासियं, पोसहोववासो, अतिहिसंविभागो य। तत्थ पढमं सामाइयं । तं पुण सावज्जजोगपरिवज्जणरूवं निरवज्जजोगासेवणरूवं च। पुण दुगं राग-दोसविसमभावरहिएणं निच्चमासेवियव्वं ति। संपयं एयं जेण आराहियं जेण विराहियं तेसि विवागदसणत्थं भण्णइ।
अत्थि इहेव भारहेवासे मागहविसए कणियारं नामनयरं। तत्थ य आबालभावाओ सह-पंसू-कीलिया नरदेवदुग्गदेवाभिहाणा दोण्णि कुलउत्तया वयंसया परिवसंति ।
अण्णया समागओ तत्थ गुरुयणाणुण्णाओ सुत्तत्थ परिकम्मियमई सण्णाइ[व]ग्ग पडिबोहणत्थं दमसारो नाम साहू । ठिओ कुंभयारकूडीए। समागओ वंदणवडियाए नयरलोगो सण्णाइवग्गो य। कहेइ साह अहिंसा-सारं जिणधम्मं । पडिवज्जति नियभूमिगाणुरूवं लोया। संपज्जइ अग्गस्स गुणा । वच्चंति वासरा।
अण्णम्मि दिणे समागया नरदेव-दुग्गदेवा । वंदिओ साहू । निसुओ धम्मो। जाया वासणा । भणियं नरदेवेण"भयवं! जइ धम्मं काउमसमत्थेण पइदिणं पहाणं केरिसमणुट्ठाणं कायव्वं सावएण?" साहुणा भणियं-“सामाइयं पढमसिक्खावयं । तम्मि कए समणो व्व समाइट्ठो सावओ जिणवरेहिं । जओ भणियंसामाइयम्मि उ कए समणो इव सावओ हवइ जम्हा । एएण कारणेणं बहुसो सामाइयं कुज्जा ॥ ५४०।।
तेहि भणियं-"जइ एवं तो अम्हेहिं दिणमझे जावज्जीवमेगवारं नियमेण सामाइयं कायव्वं ।" काऊण पडिवत्ति, वंदिऊण मुणिं, गया सट्टाणं। साहु वि संबोहिऊण सयणवग्गं गओ अण्णत्थ। ते वि जहागहियसामाइयकरणनिरया कालं गर्मिति । गाढ-धम्मसद्धओ दुग्गदेवो । इसि मंद-सद्धो नरदेवो । दुइज्जए वारंवारं दुग्गदेवेण । वहइ पओसं हियएण । 'अहो! एस मं धम्मच्छलेण दुहवेइ ।'
अण्णम्मि दिणे भणिओ तेण दुग्गदेवो-"वयंस ! अइचड्डणा धम्मविसए वि न पसंसिज्जइ । अलं मे तुहसंतियाए बोहणाए। 'अपत्तियं' ति काऊण मोणमासिओ दुग्गदेवो। धम्मत्थमुज्जएणं सव्वस्सापत्तियं न कायव्वं । इय संजमोऽविसओ, । एत्थ य भयवं उदाहरणंसोतावसा समाओ तेसि अपत्तियं मुणेऊण। एसं अबोहिबीयं तओ गओ हंतकाले वि ॥ ५४१।। इय सव्वेण वि सम्मं सक्कं अप्पत्तियं सइ जणेण । नियमा परिहरियव्वं इयरम्मि सतत्तचिताओ॥५४२।।
नरदेवो वि तहाविहधम्मसद्धविवज्जिओ कयाइ करेइ, कयाइ न करेइ, कयाइ कयाकयं करेइ। कमेण मुक्कं तेण सव्वहा वि सामाइअ-विहाणं। करेइ पउसं सामाइय-पवण्णेसु साहु-सावएसु। तप्पच्चयं समज्जिणइ किलिट्ठ कम्मं । णिहडेइ दीहसंसारं । सामाइयपरूवणतक्करणपरायणो सुयबहुमाणजुत्तो कालमइवाहेइ इयरो।
_Jain Education International 2010_04