________________
કેટલીક વાતો કરી. આજની કોર્ટોની કાર્યવાહી, પોલીસની અજાગૃતિ, લોકોની મદદ, લાંચરૂશ્વત વગેરે પ્રશ્નો અંગે વિસ્તૃત ચર્ચા થઈ. સાંજના ઓતારિયાના એક ભાઈ આવ્યા. પોતે નિરાધાર છે, એમ કહ્યું. તેમને ૧૫ દિવસનું રેશન મળે, તેમ કરી આપ્યું.
રવિશંકરદાદા ભારતના શાંતિમિશનમાં ચીન જવાના છે. તેમને કેટલીક સાવચેતી રાખવા માટેનો એક સંદેશો લઈને અરવિંદ મહેતા બોચાસણ ગયા હતા. તેઓ દાદાને મળીને પાછા આવ્યા. દાદા સાથે થયેલી વાત કરી, ચીન જવાનું તો નક્કી જ છે. પણ જો કવિશ્રી ઉમાશંકરભાઈ જોશી પ્રતિનિધિ તરીકે જશે, તો પોતે પ્રેક્ષક તરીકે જશે. હું અહિંસક છું અને જીવતો છું. એટલે શાંતિ પરિષદ કૉમ્યુનિષ્ટની હોય તોય મને શું વાંધો ! એમ સમજણ છે. કાગળ મહારાજશ્રી ઉપર લખી આપ્યો હતો.
ડીસાના મામલતદાર અને એમનાં પત્ની મળવા આવ્યા. બનાસકાંઠાના પ્રવાસ વખતે તેમના વિશે કેટલીક ફરિયાદ આવેલી. એના આધારે તેમને નોકરી ઉપરથી ઉતારી મૂકવામાં આવ્યા છે. એનો ખુલાસો કરવા આવ્યા હતા.
આજે પાળિયાદથી આઠ કાર્યકરો તે પંથકના પ્રશ્નોની ચર્ચા કરવા આવ્યા હતા. બપોરના અમદાવાદથી ભારત સેવક સમાજવાળા રાવજીભાઈ મણિભાઈ અને કુરેશીભાઈ સાથે ૩૦ ખેડૂતો, બહાર ગામના આવ્યા હતા તેમની સાથે જિન ઊભું કરવા અંગે વાતચીત કરી તેમને બોલાવ્યા હતા.
શ્રી રાવજીભાઈ સાથે કોંગ્રેસની કાયર્વાહી અને સમાજ સુધારણા અંગે ચર્ચા થઈ. રાત્રે તેમણે જાહેર પ્રવચન કર્યું હતું. તા. ૮-૯-૧૫ર
આજે રાણપુરથી ફૂલછાબના તંત્રીશ્રી નાથાભાઈ શાહ, મળવા આવ્યા હતા. એમને ચુંવાળિયા કોળી પગીઓનું એક સંમેલન ભરવા અંગે વિચાર વિનિમય કર્યો. ગિરાસદારી અને તંત્રના પ્રશ્નો ચર્ચાયા. ભાવનગર, તારાપુર રેલ્વે અંગે ચર્ચા થઈ.
ખાંભડાના ચાર ખેડૂતભાઈઓ આવ્યા, તેમણે ભેગા મળીને સંપીને ગ્રામ પંચાયત સ્થાપવા નક્કી કર્યું છે. મહારાજશ્રીએ એક હરિજન સભ્ય
સાધુતાની પગદંડી
