Agam 06 Nayadhammakahao Shashtam Angsuttam Mulam PDF File

Author(s): Dipratnasagar, Deepratnasagar
Publisher: Deepratnasagar

Page 32

[४२] जइ णं भंते समणं भगवया महावीरेणं पढमस्स नायज्झयणस्स अयमट्ठे पन्नत्ते बितियस्स णं भंते नायज्झयणस्स के अट्ठे पन्नत्ते?
एवं खलु जंबू तेणं कालेणं तेणं समएणं रायगिहे नामं नयरे होत्था-वण्णओ, तस्स णं रायगिहस्स नयरस्स बहिया उत्तरपुरत्थिमे दिसीभाए गुणसिलए नामं चेइए होत्था, वण्णओ तस्स णं गुणसिलयस्स चेइयस्स अदूरसामंते एत्थ णं महं एगं जिण्णुज्जाणे यावि होत्था - विणट्ठदेवउले परिसडियतोरणघरे नाणावहगुच्छ गुम्म-लया- वल्लि - वच्छच्छाइए अणेग-वालसय-संकणिज्जे यावि होत्था, तस्स णं जिण्णुज्जाणस्स बहुमज्झदेसभाए एत्थ णं महं एगे भग्गकूवे यावि होत्था, तस्स णं भग्गकूवस्स अदूरसामंते एत्थ णं महं एगे मालुयाकच्छए यावि होत्था, किण्हे किण्होभासे जाव रम्मे महामेहनिउरंबभूए बहूहिं रुक्खेहि य गुच्छेहि य गुम्मेहि य लयाहि य वल्लीहि य तणेहि य कुसेहि य खण्णुएहि यछणे पलिच्छण्णे अंतो झुसिरे बाहिं गंभीरे अणेग-वालसय-संकणिज्जे यावि होत्था ।
[४३] तत्थ णं रायगिहे नयरे धणे नामं सत्थवाहे अड्ढे दित्ते जाव विउल-भत्तपाणे, तस्स णं धणस्स सत्थवाहस्स भद्दा नामं भारिया होत्था - सुकुमालपाणिपाया अहीणपडिपुन्न-पंचिदियसरीरा लक्खण-वंजण-गुणोववेया माणुम्माण प्पमाण- पडिपुन्न- सुजाय - सव्वंगसुंदरंगी ससिसोमागार कंत-पियदंसणा सुरूवा करयल-परिमिय-तिवलिय-वलियमज्झा कुंडुलुल्लिहियगंडलेहा कोमुइ-रयणियर-पडिपुन्न- सोमवयणा सिंगारागार-चारुवेसा जाव पडिरूवा वंझा अवियाउरी जाणुकोप्परमाया यावि होत्था ।
[४४] तस्स णं धणस्स सत्थवाहस्स पंथए नामं दासचेडे होत्था, सव्वंगसुंदरंगे सोचि बालकीलावणकुसले यावि होत्था तए णं से धणे सत्थवाहे रायगिहे नयरे बहूणं नगर-निगम-सेट्ठिसत्थवाहाणं अट्ठारसण्ह य सेणिप्पसेणीणं बहूसु कज्जेसु य मंतेसु य जाव चक्खुभूए यावि होत्था नियगस्स वि य णं कुडुंबस्स बहूसु कज्जेसु य जाव चक्खुभूए यावी होत्था । सुयक्खंधो-१, अज्झयणं-२
[४५] तत्थ णं रायगिहे नयरे विजए नाम तक्करे होत्था- पावे चंडाल रूवे भीमतररुद्द कम्मे आरुसिय-दित्त-रत्तनयणे खरफरुस -महल्ल- विगय-भच्छदाढिए असुंपुडियउट्ठे उद्धय-पइण्ण-लंबतमुद्ध भमर-राहुवण्णं निरणुक्कोसे निरणुतावे दारुणे पइभए संसइए निरणुकपे अहीव एगंतदिट्ठीए खुरेव एगंतधाराए गिद्धेव आमिसतल्लिच्छे अग्गिमिव सव्वभक्खी जलमिव सव्वग्गाही उक्कंचण-वंचण - मायानियडि-कूड-कवड-साइ-संपओग-बहुले चिरनगरविणट्ठ-दुट्ठ-सीलायार-चरित्ते जूयप्पसंगी मज्जप्पसंगी भोज्जप्पसंगी मंसप्पसंगी दारुणे हियवदारए साहसिए संधिच्छेयए उववहिए विस्संभघाई आलीवगतित्थभेय-लहुहत्थर पउत्ते परस्स दव्वहरणम्मि निच्चं अनुबद्धे तिव्ववेरे रायगिहस्स नगरस्स बहूण अहगमणाणि य निग्गमणाणि य बाराणि य अवबाराणि य छिंडीओ य खंडीओ य नगरनद्धमणाणि य संवट्टणाणि य निव्वट्टणाणि य जूयखलयाणि य पाणागाराणि य वेसागाराणि य तक्करट्ठाणाणि य तक्करधराणि य सिंधाडगाणि य तिगाणि य चउक्काणि य पच्चराणि य नागघराणि य भूयघराणि य जक्खदेउलाणि य सभाणि य पवाणि य पणियसालाणि य सुन्नघराणि य ।
आभोएमाणे आभोएमाणे मग्गमाणे गवेसमाणे बहुजणस्स छिद्देसु य विसमेसु य विहरे य वसणेसु य अब्भुदएसु य उस्सवेसु य पसवेसु य दिहीसु य छणेसु य जण्णेसु य पव्वणीसु य मत्तपमत्तस्स य वक्खित्तस्स य वाउलस्स य सुहियस्स य दुहियस्स य विदेसत्थस्स य विप्पवसियस्स य मग्गं च छिद्दं च विरहं च अंतरं च मग्गमाणे गवेसमाणे एवं च णं विहरइ बहिया वि य णं [दीपरत्नसागर संशोधितः]
[31]
[६-नायाधम्मकहाओ]