________________
ચેતવણી
આ વાત તદ્દન સાચી માનવામાં જરા પણ શંકા નથી, કેમ કે - પ્રાશ્ચાત્ય લોકોની મનોદશા જગતમાં એક જ ધર્મ અને એક જ રંગની માનવજાતિ રાખવાની હોય અને તેના અનુસંધાનમાં - જગતમાં નવસર્જનને નામે પરિવર્તન કરાવતા હોય અને તેના કારણે શ્રી શત્રુંજ્ય તીર્થ ઉપર આશાતનાની પરંપરા વધારાતી હોય અને તે રોકવા માટે યોગ્ય સમજૂતી વગેરે પ્રયત્નો કરવામાં ન આવે તો ભવિષ્યમાં રંગીન પ્રજાઓને જગતમાં ટકી રહેવાની મુશ્કેલી ઊભી થાય, તો આશાતનાનાં વિષમ પરિણામ આવ્યાં ગણાય જ. તે ન આવે માટે શ્રી મહાતીર્થની આશાતનાઓથી રક્ષા કરવામાં ઉપેક્ષા ન સેવવી જોઈએ. તમામ પ્રકારના યોગ્ય પ્રયાસો કરી છૂટવા જોઈએ કે જે મહાઅનિષ્ટ પરિણામોથી બચાવીને રંગીન પ્રજાઓને જગતમાં ધર્મની આરાધના માટે યોગ્ય રીતે ટકાવી રાખે.
આપણા ભાઈઓ તો મોટે ભાગે બહારની ન સમજાય તેવી ગૂઢ પ્રેરણાથી બધું કરતા હોય છે. તેથી તેઓએ અને બહારવાળાઓએ ધાર્મિક પવિત્રતાનું ઊંચામાં ઊંચું મૂલ્યાંકન કરવું જોઈએ. તેથી મહાતીર્થની લેશમાત્ર આશાતના ન થાય, તેમાં પૂરતો સહકાર આપવો જોઈએ. તેમાં અવશ્ય સૌનું હિત છે.
- લેખક
