________________
શ્રી ગિરિરાજ ઉપર જીર્ણોદ્ધારનું કામ જોવા પધારવાના છે, તો શું તમે પણ તેમાં સાથે જશો ? ન જાઓ તે સારું, કેમ કે તેની સાથે મહાઆશાતના જોડાયેલી છે અને મહાતીર્થની આશાતના નાની હોય તોપણ મોટી થઈ પડે છે ત્યારે આ તો મોટી આશાતના થવાની છે. માટે સાથે ન જાઓ તો તમારા આત્મહિતમાં છે. તમે પણ સાથે હતા એવો ભાસ બીજા અજાણ જીવોને ન થાય માટે, બધાય નીચે આવ્યા પછી અથવા બીજે દિવસે કે આગલે દિવસે સ્પર્શના-પૂજા વગેરે કરી આવો તો પણ આરાધના થશે.
તમને મારી આ વાતથી આશ્ચર્ય થશે અથવા મને મૂર્ખ માનીને મારા વિષે હસવું પણ કદાચ આવે. હું આ જે લખી રહેલો છું તે ખૂબ સાવધાન મનથી, કોઈ જાતના કેફ કે ગાંડપણ વિના જાગતા મનથી, સૂધબૂધપૂર્વક લખી રહ્યો છું એમ મારો અંતરાત્મા કહે છે તેમજ ઊંઘ કે સ્વપ્નમાં નથી લખતો તેની પણ ખાતરી આપું છું અને સાથે જ મારા લખવાના પવિત્ર આશયની સ્પષ્ટતા પણ તમારી જાણ માટે કે તેવા પ્રકારના તમારા પરિચયના જીવો માટે જરૂર આ જ પત્રમાં કરવાનો છું. માટે ચકવાની જરૂર નથી. મારી સ્પષ્ટતા ઉપર તમને કેટલી શ્રદ્ધા બેસશે? તે તો હું અત્યારથી કહી શકું નહીં.
ઉપર ચાલતું જીર્ણોદ્ધારનું કામ તો ગિરિરાજની સ્પર્શના તથા સેવાપૂજા કરનારા દરેક જોઈ જ શકે તેમ હોય છે. છતાં તીર્થયાત્રાના બદલે જીર્ણોદ્ધારનું કામ બતાવવાના આશયની પાછળ કળા, કારીગીરી, શિલ્પ, સ્વચ્છતા, રમણીયતા વગેરેની બાબતમાં કેટલું કામ થયું છે? કેવું કામ થયું છે? તે બતાવી તે બાબતમાં પ્રશંસાના શબ્દો સાંભળવાની ઇચ્છા મુખ્ય હોવાનું જણાઈ આવે છે. તેમાં બહુ મોટો દોષ આ કાળે ન પણ ગણાય. મને પણ મારા કામની પ્રશંસા ગમે અને પ્રશંસા ખાતર પણ આ કાળે ધર્મના હિતના કશા દુન્યવી બદલા વિના કામ કરનારા કોણ છે?
વળી, જીર્ણોદ્ધારનું કામ ખૂબ પ્રશંસનીય છે, કરવા જેવું છે, તેનું ફળ ઘણું છે એમ શાસ્ત્રોમાં બતાવેલ છે. તેથી તે તેના ખરા રૂપમાં જરા પણ દોષ પાત્ર કે ટીકા પાત્ર નથી.
– ૬ ૧ –
