________________
ભારતના પ્રમુખ શ્રીમાન રાજેન્દ્ર પ્રસાદજીને પત્ર
અમારા જાણવામાં આવેલ છે કે આપ શ્રીમાનનો તાજેતરનો સૌરાષ્ટ્રનો પ્રવાસ બે કારણે થવો સંભવિત છે. (૧) શત્રુંજય નદીનો બંધ ખુલ્લો મૂકવાનો કે તેને લગતા કોઈ કાર્યક્રમની ઉદ્ઘાટનવિધિ માટે. (૨) પવિત્ર ગિરિરાજ શ્રી શત્રુંજય ગિરિ ઉપર હરિજનો સાથે પ્રવેશ કરવાનો.
(૧) શ્રી શત્રુંજય નદીના કિનારા ઉપરના અમારા આદિ પ્રભુ શ્રી ત્રઋષભદેવજીના પ્રાચીન કાળથી પગલાં સ્થાપિત છે. તેના કાયમી રક્ષણના પૂરા બંદોબસ્ત વિના માત્ર સ્થાનિક સરકારના ઉતાવળિયા પગલાને ટેકો આપીને તે કાર્યક્રમમાં આપ ટેકો આપો, તે ભારત સરકારના મોભાને, ન્યાયને તથા પ્રજાની ધાર્મિક લાગણીને ઠેસ પહોંચાડવા બરાબર છે. (૨) અને માત્ર રાજ્યસત્તાના પૂરા દમામ સાથે, ધાર્મિક મર્યાદાઓના ભંગ કરનારા કાર્યક્રમને મદદ આપવામાં આપનો સાથ એ અન્યાયની પરાકાષ્ઠા છે. રાજ્યના દમામથી હૃદયપલટો થતો નથી અને તેથી દબાઈને ધાર્મિક લોકોને પોતાનાં ધર્મસ્થાનોની આવશ્યક મર્યાદાનો ભંગ સહી લેવો પડે, તેના જેવો જુલમ અને બીજો કયો ભયંકર અન્યાય હોઈ શકે? અમારા કોઈ પણ લોકો, સંસ્થા કે પેઢી સરકારી લાગણીથી દબાઈને આવા પગલામાં સમ્મત રહેતી હોય, તો તેમનો પણ અમારા ધાર્મિક લોકો ઉપર જુલમ છે. આ રીતનું એકાએક આક્રમણ એ સભ્યતાથી પણ વિરુદ્ધ વસ્તુ છે.
અમે સમજીએ છીએ કે વ્યક્તિગત રીતે આપ સાત્ત્વિક વૃત્તિના છે. તેથી આવા દિલ દુભાવનારા પ્રયાસોમાં આપનો ઉપયોગ ન થવા દેવાનું માનો છો એમ અમારી સમજ છે. તો આશા છે કે આ વસ્તુ બરાબર તપાસ કરી યોગ્ય કરો એ જ પ્રેસિડન્ટ તરીકે ભૂષણ રૂપ છે. પ્રજા દેશી સરકાર પાસે ન્યાયની આશા રાખે એ સ્વાભાવિક છે, નહીં કે જુલમની આશા. ભૂતકાળમાં પરદેશીઓએ ધર્મો ઉપર જુદા જુદા જુલમો કર્યા છે ત્યારે પ્રજાએ તે મૂંગે મોઢે જુલમ માનીને સહન કર્યા છે. તે જ પ્રમાણે આજે સરકારની આવી પ્રવૃત્તિઓને જુલમ માનીને નબળાઈથી સહી લેવામાં આવે તો તે સરકારને માટે પણ કલંકરૂપ છે તેમાં ન્યાય નથી. (શ્રીમાન રાજેન્દ્રપ્રસાદજી, ભારત પ્રમુખ, નવી દિલ્હી)
– ૯૭ .
