________________
ધાર્મિક બાબતોને સંકુચિતપણું કહેતાં અને બોલતાં જીભ સંકોચાતી નથી. લખતાં કલમ થરથરતી નથી. ભારતીય પ્રજાની શી સ્થિતિ થઈ છે? ને થતી જાય છે? તે બાબત ભારે દુઃખની અને ખેદની બાબત બની રહે છે.
સૌરાષ્ટ્ર ટ્રસ્ટના મંત્રી વગેરેની ભૌતિકવાદી મનોદશાથી જેટલો ખેદ થાય તેના કરતાં ભારતવાસી પ્રજાજનો આધ્યાત્મિક પ્રગતિની કક્ષાથી ગબડી પડીને ભોતિકવાદી કક્ષાની પ્રગતિ તરફ દોરવાઈ રહ્યા છે એ ખરેખર મોટામાં મોટી ખેદકારક બાબત છે.
ભાઈઓ! ખરેખર, તમારી આ સ્થિતિ ઊંડો ખેદ ઊપજાવે એ સ્વાભાવિક છે. શ્રી ગિરિરાજની સેવામાં હાજર થઈ કેવા કેવા પવિત્ર આત્માઓ કેવા કેવા મહાકાર્યો વગેરે કરે છે! એકાદ વર્ષનો અહેવાલ વગેરેનો સૂક્ષ્મતાથી અભ્યાસ કરો તો તમને લાગશે કે એ મહામૂલ્ય ઝવેરાતની આગળ આવી સ્પર્ધાઓ વગેરે ફૂટી કોડી જેવા જણાશે.
નમ્રતાથી પોતાની ભૂલ સુધારવાને બદલે સ્પર્ધા બંધ રાખી જાહેર જનતાને ઉશ્કેરી પોતાના પક્ષમાં લઈ, પોતાના વર્તમાન પત્રની સહાયથી મોરચો માંડવા બાંય ચડાવીને સ્પર્ધા બંધ રાખી, જનતાની સમક્ષ ધાર્મિકોને ઉતારી પાડવાની પેરવી કરવા કરતાં સ્પર્ધા બંધ રાખી બીજે યોજી શકાત. હજી સમય છે, પરંતુ મોટું ચડાવી માણસ રીસાય તેવી રીતે રીસ ચડાવવાનો અભિનય સૌરાષ્ટ્ર ટ્રસ્ટના મંત્રીજીએ આ લખાણથી ધારણ કર્યાનું જણાઈ આવે છે. અરે! ભાઈઓ! કાંઈક તો વિચારો, સત્ય સમજો, એક પેપર હાથમાં આવી ગયું એટલે શું જગ જીતી લીધું? તેમાં શી મોથ મારવાની છે?
ભારતની પ્રજાના પ્રથમના સ્થાયી ધંધા લૂંટાઈ ગયા પછી પોતાનું ભણાવી-પોતાના નવા ધંધામાં ભારતના લોકોને ગોઠવી, પાશ્ચાત્યો અનેક રીતે આર્થિક ક્ષેત્રમાં પણ લાભ કેવી રીતે મેળવે છે? અને તેમાંથી ટુકડા ભારતવાસીઓને નાખે છે તેની કશી સાચી સમજ ભાઈઓ! તમે ધરાવો છો?
બંધુઓ! મગજ શાંત રાખો. સત્ય ખરી રીતે સમજો. સત્યઅહિંસાનાં બણગાં ફૂંકવાથી સત્ય અને અહિંસા નથી જડવાનાં, ઊલટા દૂર દૂર જાય છે.
– ૫ ૫
