________________
Regd. With Registrar of Newspapers for India No. R. N. I. 6067/57 વર્ષ : (૫૦) + ૧૪ ૭ અંક ઃ ૬ જૂન, ૨૦૦૩ .
શ્રી મુંબઈ જૈન યુવક સંઘનું માસિક મુખપત્ર છે
પ્રબુદ્ધ જીવન
♦ ♦ પ્રબુદ્ધ જીવન પાક્ષિક ૧૯૩૯થી ૧૯૮૯ : ૫૦ વર્ષ ૦ ૦ ૦ વાર્ષિક લવાજમ રૂા.૧૦૦/- ♠ ♠ ♠ તંત્રી : રમણલાલ ચી. શાહ
Licence to post without prepayment No. 271 ♦ Regd. No. TECH / 47 - 890 / MBI / 2003-2005
આગ, વિસ્ફોટાદિના વધતા બનાવો
છેલ્લા થોડા મહિનામાં ભારતમાં મુંબઈ, દિલ્હી, કોલકત્તા, હૈદરાબાદ, લુધિયાના, ચંદીગઢ, લખનૌ, પૂના, કાનપુર, બેંગલોર જેવા મોટાં મોટાં શહેરોમાં કારખાનામાં, ગોદામોમાં, મારકેટમાં, થિયેટરોમાં, ટ્રેનના ડબ્બાઓમાં અચાનક મોટી આગ લાગવાની એટલી બધી ઘટનાઓ બનવા માંડી છે કે વિચારશીલ માણસને આશ્ચર્ય થયા વગર રહે નહિ. અકસ્માતને લીધે, શોર્ટ સરકિટને લીધે આગ લાગી છે એવાં કારણો કેટલીક વાર અપાય છે. પરંતુ શોર્ટ સરકિટ થાય શા માટે ? આપણા દેશની આગની ઘટનાઓની કુલ સંખ્યાને એ જ સમયગાળામાં યુરોપ-અમેરિકામાં બનેલી આગની ઘટનાઓ સાથે સરખાવવામાં આવે અથવા ગરીબ અને ગીચ દેશો તરીકે ખુદ પાકિસ્તાન, બંગલાદેશ, નેપાળ, બર્મા, થાઈલેન્ડ, ચીન વગેરેની સાથે સરખાવવામાં આવે તો પણ આગની આટલી બધી મોટી મોટી ઘટનાઓનો ભારતનો આંકડો અકુદરતી લાગશે. આ બધી અવશ્ય ભાંગફોડની ઘટનાઓ છે, દેશને આર્થિક દૃષ્ટિએ મોટું નુકસાન પહોંચાડવાની અને અરાજકતા ફેલાવવાની પ્રવૃત્તિ છે.
પકડાયા વગર મોટી આગ લગાડવાનું હવે અઘરું નથી. કાગળ, કાપડ, લાકડું, તેલ, રસાયણો, ગેસ સિલિન્ડર ઇત્યાદિ જલદી સળગે અને ભડકા વધે એવી જગ્યાએ જ્વલનશીલ પદાર્થવાળી બેગ કે પ્લાસ્ટિકની કોથળી, અંદર ‘ટાઈમર’ મૂકીને ક્યાંક ચૂપચાપ રાખી દેવામાં આવે તો એનો સમય થતાં તાખો થઈ મોટી આગ ફેલાવી શકે છે. આવી આગ ફેલાવનારા કોણ હોય એ વિશે તો સૌ કોઈ સમજી શકે એમ છે.
આપણે ત્યાં વાયુસેનાનાં મિગ વિમાનો જે ઝડપથી એક પછી એક તૂટી પડે છે એવી ઘટના દુનિયાની કોઈ પણ વાયુસેનામાં બની નહિ હોય. વિમાનો જૂનાં છે એ સાચું છે. તો પણ એ ઉડ્ડયનક્ષમ છે એ પણ એટલું જ સાચું છે, તો પછી આટલાં બધાં વિમાનો કેમ તૂટી પડે છે ? ઉડ્ડયનના થોડા સમય પછી વિમાનમાં ધૂમાડો દેખાય છે. આમ કેમ ? આપણી વાયુસેનામાં જ કોઈક એવા વિદેશી કે વિદ્રોહી એજન્ટો રીતસર ભરતી થઈ ગયા હોવા જોઇએ કે જેઓ એવી સિફ્તથી વિમાનોની સર્વિસ-મરામતના કાર્ય વખતે કોઈક અંદરના વાયરને જરાક ઘસી નાખતા હોવા જોઇએ કે જેથી ઉડ્ડયન પછી થોડા વખતમાં ગરમ થયેલા વાયર ઓગળતાં શોર્ટસર્કિટ થઈ જતાં હશે ! આ તો માત્ર સામાન્ય અનુમાન છે. નિષ્ણાતો એ વિશે વધુ કહી શકે. પરંતુ આવા ભાંગફોડના ગુપ્ત કાર્યમાં વાયુસેનાના જ કોઈ ઉચ્ચ અધિકારી-અધિકારીઓ સંડોવાયા હોય એમ બની શકે. મિગ વિમાનો ઉપરાંત આપનાં શસ્ત્રાગારોમાં પણ આગ લાગે છે. આવી ઘટનાઓ જો માત્ર આકસ્મિક હોય તો સેના માટે શરમરૂપ છે અને આતંકવાદી ભાંગફોડની ઘટના હોય તો તે પકડવા માટે સેનાનું ગુપ્તચર તંત્ર બહુ નબળું છે એમ કહેવું જોઇએ. સોવિયેટ યુનિયને આવી ઘટનાઓને નિવારવા માટે નિયમ
કર્યો હતો કે કોઇપણ સ્થળે એકલો માણસ ફરજ પર ન હોવો જોઇએ. ઓછામાં ઓછા ત્રણ માણસ હોવા જોઇએ. એ માટે માણસો વધારવાની બહુ જરૂર નથી, આયોજન વ્યવસ્થિત હોવું જરૂરી છે.
આતંકવાદીઓનું હવે એક વધુ લક્ષ્ય બન્યું છે રેલવે. રેલવેના અકસ્માતો દિવસે દિવસે વધતા જાય છે. કેટલીયે ટ્રેનો પાટા પરથી ઊતરી જવા લાગી છે ! તદુપરાંત રેલવેમાં આગ લાગવાના બનાવો પણ વધતા જાય છે. યાંત્રિક ખામી, શોર્ટ સર્કિટ વગેરે કારણો તો ક્ષુલ્લક છે. જો ભાંગફોડ ન હોય તો થોડી મિનિટોમાં જ ફ્રન્ટિયર મેલના એક ડબ્બામાં લાગેલી આગ ત્રીજા ડબ્બા સુધી કેવી રીતે પહોંચી જાય અને ત્રણે ડબ્બા બળીને ખાખ કેવી રીતે થઈ જાય ? મુસાફર તરીકે ટિકિટ લઈ સ્ફોટક કે જ્વલનશીલ સામાન ટ્રેનમાં મૂક્યા પછી આતંકવાદીઓ ઊતરી ગયા હોવા જોઇએ. આવી ઘટનાઓ વિમાનોમાં અટકાવી દેવાઈ છે, પરંતુ એવું રેલવેની બાબતમાં સરળ નથી. એનાં કારણો દેખીતાં છે. તો પણ રેલવેતંત્રે હવે વધુ સાવધ બનવાની જરૂર છે. શંકાસ્પદ મુસાફરોના સામાનની અચાનક ચકાસણી થવી જોઈએ. આ કાર્ય ધારીએ એટલું સહેલું નથી અને નિર્દોષ મુસાફરોની હાડમારી વધવી ન જોઇએ એ પણ એટલું જ જરૂરી છે. રેલવેતંત્રે જ આ અંગે ઉપાયો વિચારવા જોઇએ.
છેલ્લાં દસ-પંદ૨ વર્ષમાં અલકાયદાના હજારો આંતકવાદીઓ, જાસૂસો આપણા દેશમાં પથરાઈ ગયા છે, અરે આપણા સૈન્યમાં પણ ભરતી થઈ ગયા છે. મુલુંડ બોમ્બ ઘટનાનો પકડાયેલો આરોપી આપણી ખડકવાસલાની નેશનલ ડિફેન્સ એકેડેમીનો પ્રોફેસર છે એ શું બતાવે છે ?
કાશ્મીર ઉપરાંત પાટનગર દિલ્હી, હૈદરાબાદ અને મુંબઈમાં થાણા જિલ્લામાં સૌથી વધુ આતંકવાદીઓ ભરાયા છે અને દેશદ્રોહી સ્થાનિક નાગરિકો પણ એમાં ભળ્યા છે.
ભારતમાં હવે મોટાં કારખાનાંઓમાં, ગીચ વસ્તીવાળાં કેન્દ્રોમાં, મારકેટોમાં, વીજળી અને પાણીના પુરવઠાના સંવેદનશીલ મથકોમાં અને એનાં બીજાં જાહેર સ્થળોમાં, જાપતો વધારવાની અને તેની આસપાસ રક્ષકો ઉપરાંત પૂરતી સંખ્યામાં ગુપ્તચરો ગોઠવવાની જરૂર છે. ગુપ્તચર તંત્ર વિશાળ અને સક્ષમ હશે તો કેટલાંયે કાવતરાં ઘડાય તે પહેલાં નિષ્ફળ બનાવી શકાશે.
જો આપણે વેળાસર જાગીશું નહિ તો આત્મઘાતી આતંકવાદીઓ દ્વારા મોટી મોટી વિનાશક ઘટનાઓનો ભોગ બન્યા વગર રહીશું નહિ. આર્થિક નુકસાન તો ખરું જ, પણ અનેક નિર્દોષ માણસોના અચાનક જાન જાય છે એનું દુ:ખ હૃદયને હલાવી નાખે છે.
સબકો સન્મતિ દે ભગવાન !
7 તંત્રી
