________________
( ચૌદમા શ્રી અનંતનાથ પરમાત્માનું સ્તવન)
મુરતિ હો પ્રભુ મુરતિ અનંત નિણંદ,
તાહરી હો પ્રભુ, તાહરી મુઝ નયણે વસી જી ! સમતા હો પ્રભુ, સમતા રસનો કંદ,
સહેજે હો પ્રભુ, સહેજે અનુભવ રસ લસી જી II 1 II
ગાથાર્થ :- હે અનંતનાથ પ્રભુ ! તમારી મુર્તિ અર્થાત્ તમારી મુદ્રા મારા નયનમાં વસી ગઈ છે. તમારી મુદ્રા અનંત એવા સમતા રસના કંદસ્વરૂપ છે. સ્વાભાવિકપણે જ આત્મગુણોના અનુભવના રસથી લયલીન છે તેમાં જ ઓતપ્રોત છે. / ૧ /
વિવેચન :- ચૌદમા શ્રી અનંતનાથ પરમાત્માની સ્તુતિ કરતાં ગ્રંથકારશ્રી જણાવે છે કે હે શ્રી અનંતનાથ પ્રભુ ! તમારી મૂર્તિ અર્થાત્ તમારી વીતરાગ અવસ્થાવાળી મુખમુદ્રા મારા નેત્રકમળમાં વસી ગઈ છે. ભક્તિ કરનારા ભક્ત ઉપર પણ રાગ નહી. અને ઉપસર્ગ કરનારા શત્રુ ઉપર પણ દ્વેષ નહી. કેવી વિચિત્ર વાત ? આવા પ્રકારની રાગ અને દ્વેષ એમ બન્ને દોષો વિનાની કેવલ સમતા રસથી જ ભરપૂર ભરેલી જાણે સમતા રસનો કંદ જ હોય તેવી તમારી મુખમુદ્રાને હું સતત નિરખી રહ્યો છું.
જેમ જેમ વધારે દેખું છું. તેમ તેમ આત્માના ક્ષાયિકભાવના અનંતગુણોનો અનુભવ કરવાના રસમાં જ લયલીન બનેલી આ મુદ્રા સતત જોયા જ કરવાનું મન થયા કરે છે. ક્યાંય અલ્પમાત્રાએ પણ નહી ક્રોધાદિના આવેશો કે નહીં કામ વાસનાના આવેશો. કેવલ વીતરાગતાની જ સાક્ષાત્ છબી એવી તમારી મૂર્તિને નિરખ્યા જ કરવાનો ભાવ થયા કરે છે. દૂર જવાનું કે ત્યાંથી ખસવાનું મન જ થતું નથી. | ૧ |
