________________
શ્રી મહાવીરસ્વામી પરમાત્માનું સ્તવન
૧૭૯
નથી.) તે માટે હે બાપજી હે તાત ! આપશ્રી આપના તારક એવા બિરૂદને સાચવવા માટે પણ આ સેવકને તારજો. પરંતુ દાસની સેવાભક્તિ સામે જરા પણ ન જોશો. (નજર ન નાખજો) કારણ કે તે બાબતમાં તો મારી શૂન્યતા જ છે. || ૬ ||
-
વિવેચન :- ગાથાનો અર્થ સમજાય તેવો છે. ત્રણે જગત ઉપર ઘણા જ વાત્સલ્યભાવવાળા એવા હે વીતરાગ પરમાત્મા શ્રી મહાવીરપ્રભુ ? આપશ્રી મૃત્યુલોકના સર્વ માનવીઓનું હિત-કલ્યાણ જ કરનારા છો. અતિશય વાત્સલ્યભાવ આપશ્રીમાં ભરેલો છે.
આ વાત શાસ્ત્રો દ્વારા અને શાસ્ત્રજ્ઞ જ્ઞાનીઓ દ્વારા સાંભળીને હું આપશ્રીના ચરણકમળમાં શરણે આવેલો છું. મને આ સંસારમાંથી તારવાને જો કોઈ સમર્થ હોય તો આ શ્રી મહાવીર પરમાત્મા જ છે આવી મને પાકી ખાત્રી થઈ છે.
તમે જ તારક હોવાથી મારૂં મન મેં તમારા ચરણકમલની નિશ્રામાં સ્થાપિત કર્યું છે. તારક થઈને તમે મને ન તારો આ કેમ બને ? આ કારણે જ હું તમારો છેડો છોડવાનો નથી. તે માટે હે પરમેશ્વર પ્રભુ ! મારો આત્મા તો અનાદિ કાળથી મોહની ઝપટમાં લપેટાયેલો હોવાથી મોહદશા પલટીને વૈરાગ્ય વાસિત થઈને સર્વથા સાધના કરે એવું તુરત દેખાતું નથી. તેથી ભોળાભાવે આપશ્રીને કહું છું કે, હે તાત ! હે દીનબંધુ ! દાસ એવા મને તમે તારજો. છેલ્લે છેલ્લે તમારૂં “તારકતાનું બિરૂદ' સાચવવા માટે પણ દાસ એવા આ સેવકની ભક્તિ સામે જોશો નહીં. (જો તે જોશો તો તેમાં શૂન્યતા જ દેખાશે તે માટે તે બાજુ જોયા વિના તમારું તારકતાનું બિરૂદ સાચવવા માટે પણ મને) તારજો. આ કારણે જ તમારા ચરણકમળમાં આવ્યો છું એમ સમજીને સેવક ગણીને જરૂર તારજો .
