________________
बाज नैं जुआब दिया, "राज्जा ! मन्नै थारी बड्डी - २ बात्तां तै के लेणा सै ? मन्नैं तै भूख लाग रही सै। आप मेरा खाणा मेरे तै सोंप यो । जै मैं भूख तै मर गया तै इस हत्या का पाप भी आप के ए लाग्गैगा ।
"थम इब्बै मेरी रसोई मैं चाल्लो। ओड़ै तरां तरां के पकवान बण रहे सैं, वे खा कै आपणी भूख मिटा लियो । ”
बाज नैं कही, "मैं ते मांस खाण आला जीव सूं। थारी गेल्लां ओड़े जा कै के करूंगा ? मन्नैं ते कबूत्तर उलटा दे यो। इसनें खा कै ए मैं आपणी भूख मिटाऊंगा । "
राज्जा नैं सोच्ची- मैं तै बड़े धरम संकट मैं फँस गया। कबूत्तर नैं ना बचाऊं तै यो बिचारा जान तै ज्यागा। कबूत्तर नैं ना छोड्डूं तै बाज भूक्खा मर ज्यागा ।" माड़ी वार वे सोच बिचार करदे रहे ।
फेर वे भित्तर-ए-भित्तर हांसे । उन नैं बाज तै कहीं, "थम कबूत्तर की जंगा मेरा मांस ले ल्यो ।” जिब्बै ए राज्जा नैं सेवकां के हाथ एक तराज्जू मंगाई । उन नैं एक पलड़े मैं कबूत्तर बिठाया अर दूसरे पलड़े मैं चक्कू ते आपणी देही का मांस काट-काट कै धरण लाग्गे ।
पर यो के ? राज्जा नैं आपणे सरीर का आधा मांस काढ़ के पालड़े पै धर दिया। फेर भी कबूत्तर आला पलड़ा ए भारी रहूया । राज्जा मेघरथ की देही जाणुं लहू मैं न्हाई होई बैट्ठी थी। ताक्कत घटती जा थी। फेर भी उन नैं धीरज ना छोड्या |
आक्खर मैं राज्जा हिम्मत करकै पलड़े कान्नीं गए। अर वे आपणे आप पालड़े मैं जा के बैठ गे । भित्तर-ए-भित्तर उननैं संतोस था अक उनका सरीर एक कबूत्तर की जान बचाण मैं काम आण लाग रहूया सै ।
हरियाणवी जैन कथायें / 16
