Nandanvan Kalpataru 2019 11 SrNo 43

Author(s): Kirtitrai
Publisher: Jain Granth Prakashan Samiti

Page 8

पुस्तकस्था परा विद्या, प्राप्या किं पठनं विना ?। कृत्वैव भोजनं भ्रातः !, तृप्तिश्शक्तिश्च लभ्यते ।
अस्तु पुस्तकप्रीतिरस्माकम् ।
डो.वासुदेव वि. पाठकः 'वागर्थः'
*****
यथायोग्ये यथायोग्यं, तथैव च यथापले। यद्याप्तं पुस्तकं योग्यं, तर्हि कल्पतरुप्रभा।
महाकविना कालिदासेन रघुवंशस्याऽऽरम्भे सम्यग्विचार्य कृता वन्दना पार्वतीपरमेश्वरयोः । तत्र, वागर्थाविव सम्पृक्तौ तौ, इति निवेदितम् । अपेक्षाऽप्यस्ति 'वागर्थप्रतिपत्तये' । एवं जाते, जायते शब्दपाकस्य काव्यम् । तादृशान्येव काव्यानि जीवन्ति ।
सुदीर्घकालात् प्राप्तानि तादृशानि काव्यानि, अस्माकं ज्ञानवृद्ध्यर्थं, तदनु च सविशेषां साहित्यसमृद्धिमानेतुमपि कल्पवृक्षसदृशानि भवन्ति।
नवं नवं ज्ञानं विज्ञानं च तत्र तत्र सन्दृश्यते पुस्तकेषु । सुचारुतया सगृहीतं सम्यक्तया शनैः शनैः पठ्यमानं च तद् वैचारिकी सम्पत्तिं जनयत्यभिव्यक्त्यर्थं च सामर्थ्यं प्रददाति । समग्रा चैषा चर्चा, निर्दिष्टे श्लोके निवेदिता सारतः। प्रवर्तिता एषा प्रथा समग्रस्य समाजस्य कृते, जनयति नन्दनवन-सौख्यं, परमानन्दं च जनयति । एतदर्थं वाचनप्रवृत्तिप्रोत्साहका गुरवः सबहुमानं प्रणम्यन्ते । फलतः
तपः सारस्वतं नः स्याद्, विवृद्धं संस्कृताश्रितम् । गुरूणामाशिषा चैव, प्रीतिरस्तु परात्परा॥ गरिमा देशिकानां या, भवति प्रेरणात्मिका। लोपस्तस्याः कदाप्येव, न भवेदिति प्राप्यते ।। इति शम् ॥
डो.वासुदेव वि. पाठकः 'वागर्थः'
******
भवद्भिः प्रेषितं नन्दनवनकल्पतरोः ४२तममकं प्राप्तवानहम् । एतच्छलाघार्थं मम शब्दकोशे शब्द एव नास्ति । देवभाषोत्थाने भवतां योगदानमप्रतिममस्ति । मम पक्षतो नैकाः शुभाशयाः प्रेषयामि।
डॉ. राजेन्द्र जोशी, लोहारदा (जि. देवास, म.प्र.)