________________
પણ છેલ્લીવાર જ્યારે બૌદ્ધભિખ્ખુ પાસે ગયા ત્યારે તેની અકાટ્ય દલીલોથી હવે તેને બૌદ્ધધર્મ જ સર્વથા ચોટ અને શ્રેષ્ઠ લાગ્યો. જૈનધર્મ પ્રત્યે અને પોતાના ગુરુ પ્રત્યે ભયંકર અનાદરભાવ પેદા થયો. અત્યારસુધી તો ગુરુ પાસે જયારે જતા હતા, ત્યારે પુષ્કળ વિનય સાચવતા હતાં. હૈયામાં આદર ઊભરાતો હતો. પણ આ વખતે તો સાધુપણું છોડી દેવાનો નિશ્ચય છે. જૈનધર્મ પ્રત્યે જરાય આદર નથી. પછી જૈનસાધુ પ્રત્યે તો આદર ક્યાંથી હોય ?
અંદર પાટ ઉપર ગુરુભગવંત બિરાજેલા છે અને બહારથી જ સિદ્ધર્ષિ ‘મર્ત્યએણ વંદામિ’ પણ કહ્યા વિના અનાદરપૂર્વક કહે છે, ‘આ તમારો ઓધો પાછો.'
તેના અનાદરભર્યા શબ્દો સાંભળીને ગુરુને થઇ ગયું કે હવે આ કેસ મારા હાથમાં નથી.
જ્યાં સુધી સામેની વ્યક્તિમાં આપણા પ્રત્યેનો સદ્ભાવ જીવતો હોય ત્યાં સુધી આપણે તેનામાં ગમે તેટલો ફેરફાર કરી શકીએ છીએ. તેને યોગ્ય માર્ગદર્શન આપીને સુધારી શકીએ છીએ. પણ જ્યારે સામાના હૃદયમાં આપણી પ્રત્યેનો સદ્ભાવ ખતમ થઈ જાય ત્યારે બાજી આપણા હાથમાં રહેતી નથી, તેવા વખતે તેના હિત માટે પણ જે કહેવાય તે તેને ઊંધું પડતું હોય છે. તેનામાં આપણા પ્રત્યે વિશેષ અસદ્ભાવ પેદા કરનાર બને છે.
માટે જ માતા-પિતાએ પોતાના પુત્રોને તે રીતે જ પ્રેરણા-હિતશિક્ષા કે સલાહ આપવી જોઇએ કે જેથી તેના હૃદયમાં રહેલો માતા-પિતા પ્રત્યેનો સદ્ભાવ ખતમ ન થાય. જો સદ્ભાવ ખતમ થઇ રહ્યો છે, તેવું લાગે તો ટકોર કરવાનું બંધ કરી દઇને, ફરી સદ્ભાવ પેદા કરવાનું કામ શરૂ કરી દેવું જોઇએ. પણ ભૂલેચૂકે ય સદ્ભાવ ખતમ ન થઇ જાય તેની કાળજી લેવી જોઇએ.
જો સદ્ભાવ ખતમ થઈ ગયો તો હવે તેને સુધારી શકવાની તે મા-બાપમાં કોઈ શક્યતા નથી. હવે તો તેવા મા-બાપે તેવા દીકરાને કાંઇપણ કહેવાનું પણ બંધ કરી દેવું જોઇએ. અને તે કેસ કાળને સોંપી દેવો જોઇએ. તેના જીવનમાં પરિવર્તન આવે તે માટે બહારના બધા ઉપાયોને છોડી દઇને, પરમાત્માને પ્રાર્થના કરવી જોઇએ. કાળ પાકશે ત્યારે ઓટોમેટીક સારું થશે.
સિદ્ધર્ષિના હૃદયમાં પોતાના પ્રત્યેનો સદ્ભાવ હવે ઊભો રહ્યો નથી, તે જાણતા ગુરુને હવે તેમની સાથે ચર્ચા કરવામાં કોઇ ફાયદો ન દેખાયો.
૧૪. સૂત્રોના રહસ્યોભાગ-૨
