Satthisay Payaranam

Author(s): Jaydarshanvijay
Publisher: Jinagna Prakashan

Page 7

જે પાપનવમી પર્વમાં લાખો બકરાં-પાડાઓ હણાય છે તે પણ પર્વને શ્રાવકો પૂજે છે તે વીતરાગની હીલના છે.” (કારિકા-૭૬) તે સમયનું વાતાવરણ કેવું હશે કે આવા હિંસાત્મક પર્વને શ્રાવકો પણ માનવા લાગી જાય. જયારે તુચ્છ સ્વાર્થ મગજ પર સવાર થાય ત્યારે આવી હિંસાને પણ માન્યતા આપવા જીવ તૈયાર થાય.
જે ગૃહ કુટુંબનો માલિક થઈને અહીં આ નૈવેદ્ય ચડાવું, અહીં વિવાહાદિમાં આ વિધિ કરવો' ઇત્યાદિ મિથ્યાત્વની સ્થાપના કરે છે તેના વડે આખોએ વંશ અને તે પોતેય ભવસમુદ્રમાં નંખાયો છે.' (કારિકા-૭૭)
કડવા ચોથ, નવમી, વત્સબારસી, પિતૃઓને પિંડદાન વગેરે લૌકિક-લોકોત્તર અને મિથ્યાત્વના ભાવને સૂચવનારાં પર્વો જે કરે છે. તેઓમાં સમ્યકત્વ નથી. (કારિકા-૭૮)
અહીં કડક શબ્દોમાં મિથ્યાત્વમાં કુટુંબને નાખનારા ઘરના મોભીની ખબર લઈ નાંખી છે. તે વખતે આવું નજરે ચઢતા સમકિતના પક્ષપાતી આ શ્રાવક વ્યાકુળ બની ગયા છે. આજની વાત વિચારીએ તો ગૃહપતિ કરતા યતિપતિઓ પણ કારિકા-૭૭માં નિષેધેલી વિધિઓ સામેથી સૂચવતા થઈ ગયા છે. વાત એથી પણ આગળ વધે છે. સમક્તિમિથ્યાત્વની વાત કરનારા ઉપર તિરસ્કાર પેદા કરવાનું ભયાનક કૃત્ય પણ આજે ચાલે છે. એક તો અયોગ્ય પ્રવાહ પેદા કરવો અને તેનો વિરોધ થાય તો વિરોધ કરનારાને બદનામ કરવા : આ બધું બેધડક ચાલે છે. આ ભંડારીજી આજે હયાત હોત તો ઘણી નવી કારિકાઓ રચાઈ ગઈ હોત.
શ્રી ધર્મદાસ ગણી વડે રચાયેલા ઉપદેશમાળાના સિદ્ધાંતને બધા શ્રમણો અને શ્રાવકો માને છે, ભણે છે અને ભણાવે છે. તે જ સિદ્ધાંતને અભિમાન અને મોહરૂપી ભૂતો વડે ઠગાયેલા કેટલાક અધમજીવો ક્રિયાથી હલના પમાડતા હા! દુઃખોને ગણકારતા નથી. (કારિકા ૯૬-૯૭)
શ્રી ધર્મદાસ ગણી ભગવંતને ન માનનારા આજના કાળમાં દેખાતા નથી. તે કાળમાં ભંડારીજીને નજરે પડતા હતા. કઈ રીતે તેઓ આ મહાપુરુષનો તિરસ્કાર કરતા હતા તેની વાત ટીકામાં જણાવી છે. સમજી શકાય છે કે તે કાળમાં ચૈત્યવાસીઓનું જોર ભયંકર હતું. ચૈત્યવાસીઓની ચામડી ઉતરી જાય તેવા ચાબખા શ્રી ધર્મદાસ ગણી ભગવંતે ઉપદેશમાળામાં લગાવ્યા છે. એ આળી ચામડીના ચૈત્યવાસીઓથી સહન ન થાય એટલે તેની સામે પડ્યા હોય તે બનવા જોગ છે. ભંડારીજીના સુપુત્ર આચાર્યશ્રી જિનેશ્વરસૂરિ મ.એ ચૈત્યવાસીઓને લગાવેલી લપડાક પ્રસિદ્ધ છે. પછી આ ભંડારીજી કેમ બાકી રહે!
કારિકા ૧૦૩-૧૦૪-૧૦૫માં પોતાની માધ્યસ્થ વૃત્તિને બતાવી છે. છતાં તેમાં શુદ્ધનો પક્ષપાત ઊડીને આંખે વળગે તેવો છે. બાપદાદાથી ચૈત્યવાસીઓને માનતા આવ્યા હોય અને જાણીને પણ તેમને છોડતા નથી તેની પણ સારી એવી ખબર લઈ નાંખી છે. સુગુરુને જ વંદન કરવું ઈત્યાદિ વાતો પણ અભુત લખી છે. આજે સદીઓ જૂના આ ભગવાનના માર્ગને નવો કહેવામાં આવે છે અને લોકોને ભડકાવવામાં આવે છે. તે કેટલું અયોગ્ય છે.