________________
નવાબનો આશ્ચર્યકારી દિલ-પલટો
ગરવા ગઢ ગિરનારની તળેટીનો શાંત-પ્રશાંત અને પ્રાકૃતિક સૌન્દર્યથી સભર પ્રદેશ હતો. ગિરનારની તળેટી એટલે જાણે આશ્રમો ને શિવાલયોથી ભરી ભરી ધરતીનો ખડતલ ખંડ ! ઝરણાં વહી રહ્યાં હોય, ખળખળ નાદે નદીઓ પ્રવાહિત હોય, આંબાવાડિયા પર કોયલો કૂજન કરી રહી હોય, અને હરણિયાં કૂદાકૂદ કરી રહ્યાં હોય, આવા નીરવ વાતાવરણ વચ્ચે આશ્રમો અને શિવાલયોમાંથી શંખધ્વનિ રેલાતો અને વાતાવરણનો કણકણ મુખરિત બની ઊઠતો.
શિવશક્તિના શ્લોકો અને શંખધ્વનિ સિવાયનો કોઇ નાદ જ્યાંથી નહોતો રેલાતો, એવા વાતાવરણમાં નદી કિનારે એક દહાડો એકાએક બંદૂકનો ભડાકો સંભળાતાં જ મહંત મૌનગીરીજી મંદિરમાંથી બહાર ધસી આવ્યા. એમની નજર દૂર દૂર બંદૂક તાણીને ખડા રહેલા જૂનાગઢના રસૂલખાનજી પર પડી અને એમનો પુણ્ય પ્રકોપ વાતાવરણમાં પડઘાઈ રહ્યો : શિવના ધામમાં શિકાર? શંખ ધ્વનિની જગાએ બંદૂકના ધડાકાભડાકા ? હું આ શું સાંભળી રહ્યો છું
મહંતના આવા પુણ્ય પ્રકોપનો એવો પડઘો પડ્યો કે, એક વાર તો રસૂલખાનજી પોતાની સામે ઊઠેલા આ પડકારથી હેબતાઈ જ ગયા. તેઓ પાટવી કુંવર હતા. પિતા મહોબત ખાનજી જૂનાગઢનાં સત્તાસૂત્રો સંભાળી રહ્યા હતા. માતા નૂરબીબી રાજમાતા તરીકેનું પદ શોભાવતાં
- સંસ્કૃતિની રસધાર ભાગ-૩
