________________
૧૨
આવા મહાપુરુષની પાછળ જો પ્રજા કાંઈક કરતી હોય, તો પ્રજાપાલક તરીકે રાજા તો અવશ્ય કાંઈક કરે. એમાં પણ અકબર તો આચાર્યશ્રીના ઉપકારને જીવનની સાર્થકતા માનતો, તેથી ઉનાના જે બગીચામાં આચાર્યશ્રીનો અગ્નિસંસ્કાર કરવામાં આવ્યો હતો તે બગીચો અને આસપાસની બાવીસ વિઘા જમીન અકબરે જૈનશાસનને ભેટ ધરી દીધી. આજે ત્યાં તેમના પગલાં સ્થાપિત છે.
આચાર્યશ્રીના નિર્વાણ સાથે જોડાયેલી એક અદ્ભુત ઘટના આ મુજબ બની. જે સ્થાનમાં તેમનું અગ્નિસંસ્કરણ થયું, ત્યાં પાસેના ખેતરમાં સૂતેલા એક નાગર વાણિયાએ નાટારંભ થતાં જોયાં. તેણે લોકોને વાત કરી. સવારે સૌ ત્યાં આવી પહોંચ્યા ત્યારે એ સમયે ત્યાં નાટારંભ તો નહોતો. પરંતુ વાડીના તમામ આંબાઓ પર કેરીઓ (ભાદરવા મહિનામાં) આવી ગઈ હતી. જે આંબા ઘણા સમયથી ફળતાં ન હતા, ત્યાં પણ કેરીઓ હતી ! લોકોના આશ્ચર્યનો પાર ન રહ્યો. આ કેરીઓ સમ્રાટ અકબર સહિત ગામેગામ મોકલવામાં આવી.
“મરણ પામ્યે ફળ્યા આંબા પામ્યો સુર અવતાર રે...”
આવા મહાપુરુષને યાદ કરતી વખતે અહિંસા અને કરુણાની મૂર્તિ સમાન આચાર્યશ્રીની ગુણગંગાની પાવનધારામાં આપણે પાવન થઈએ એવી મંગળકામના.
