________________
૫૮ ભૂમિકાએ બધું જ પૂર્ણ થઈ જાય છે. પરંતુ જેમનાં નામ ઇતિહાસની અટારીએ આલેખાયેલાં હોય તેઓનું જીવન પ્રેરણાસ્ત્રોત હોય છે. સત્યરુષોનાં ચરિત્રો આત્માને અજવાળે છે. - અહીં શ્રી જૈનકથા સાહિત્યમાં સ્ત્રીચરિત્રો પરનો અભ્યાસ છે, એટલે ઉત્તમ ઘરેણું અહીં સચવાયું છે. તેથી સ્વાભાવિક છે કે ઉત્તમ ચરિત્રોનું વાચન, ચિંતન અને મનન થવાથી ઉત્તમતાના અંશોનો વિસ્તાર થાય છે. શાસનની મહાન વિભૂતિઓની ગૌરવગાથા અહીં પ્રાપ્ત થાય છે. જે વર્તમાન અને ભાવિ પેઢી માટે દિશાસૂચક બની શકે.
ચરિત્રો હંમેશા પ્રેરણાદાયી હોય છે. અહીં તો શ્રમણીઓ અને શ્રાવિકાઓના સ્તરનાં ચરિત્રો આલેખાયાં છે. અને એનું વિશેષ વલોણું કરીને અર્ક પામવાનો પ્રયાસ થયો છે. તેથી આ અંશોરૂપે પણ વર્તમાન મહિલા સમાજ માટે દીવાદાંડી બની રહેશે.
હાલના ઝંઝાવતી પવનમાં ભ્રષ્ટાચાર, દુરાચાર, માનસિક વિકૃતિઓ, ભૌતિક સુખની ઘેલછાની સાથે સાથે દોડાદોડીવાળું જીવન, નાનપણથી જ વધતી જતી ધર્મવિમુખતા વગેરે વ્યક્તિને ધર્મ ટકાવવા કે સાચા સંસ્કારોને પામવામાં અવરોધ જન્માવે છે.
સ્ત્રીઓ માટે વર્તમાન સમય વિકટ છે, ભલે આજે સ્ત્રીઓ વિકાસની આગેકૂચ કરી રહી છે, પરંતુ તેના શીયળની રક્ષાની કોઈ ખાતરી નથી. તપ, સંયમ અને મૂલ્યોની વાતો વિસરાઈ ગઈ છે, ત્યારે શીલ અને ચારિત્રની રક્ષા માટે કુરબાની આપવા પણ તૈયાર એવી સતીઓનાં નામ યાદ આવે. (નાગિલા) - આજકાલ ભૌતિક સુખ પાછળ સંપત્તિ વેડફી દેનાર શ્રીમંત સ્ત્રીઓને ક્યાં ખબર હશે કે સંપત્તિનો ભવ્ય અને જાજરમાન વારસો જે આજે દેલવાડા (આબુ)ના વિમલવસહીનાં ભવ્ય જિનાલયોરૂપે આપણને મળ્યો છે તે અનુપમાદેવીએ આપ્યો છે ?
