________________
જૈન કથા સાહિત્યમાં સ્ત્રીચરિત્રો
[સારાંશ : પ્રસ્તુત અભ્યાસલેખ જૈન કથા સાહિત્યના વિશાળ ફલકમાંથી સ્ત્રીચરિત્રો વિષેનો છે. આ અભ્યાસનો મુખ્ય હેતુ સ્રીચરિત્રોની લાક્ષણિકતાઓ તારવીને આ વારસાના મહત્ત્વને વર્તમાન સંદર્ભે તપાસવાનો છે. સમય, ક્ષેત્ર અને આયોજનને ધ્યાનમાં રાખીને કેટલીક મહત્ત્વની અને પ્રતિનિધિરૂપ ગણી શકાય એવી કથાઓને આધારે આ અભ્યાસલેખ તૈયાર કર્યો છે.]
પ્રસ્તાવના
કાળના પ્રવાહમાં જયવંતા
જિનશાસનની કીર્તિગાથાઓ દીવાદાંડી બનીને આજે પ્રકાશ પાથરી રહી છે. જે રીતે ઘૂઘવતાં મહાસાગરમાં કેટલાંક બિંદુઓ અમૃત બનીને વિપુલ જળરાશિને ગૌરવવંતુ કરી દે છે, એ રીતે જૈનશાસનના ભવ્ય ભૂતકાળને ઉજાગર કરીને અનોખી પુષ્પ પરિમલ પાથરનાર જૈન કથાનકોએ જિનશાસનને ગૌરવવંતુ બનાવ્યું છે. શ્રી જૈન ધર્મધારાએ જાળવી રાખેલો કથાવારસો સમૃદ્ધ બન્યો છે એનું મુખ્ય કારણ છે શ્રી જૈનશાસનના ઉદ્યાનમાં પુષ્પોની પરિમલ પાથરી ગયેલી વીર અને પ્રતાપી પ્રતિભાઓ.
