________________
આજે આવા પૂજ્ય ગુરુદેવના જીવનને નિહાળી રહ્યા છીએ. સરિતા કોને મળવા જાય છે ? આપણે સહુ કોઈ જાણીએ છીએ – સાગરને મળવા જાય છે. આજે આપણે સહુ એ જ્ઞાન, ધ્યાન અને યોગના મહાસાગરને મળવા જઈએ છીએ.
પૂજ્ય શ્રીમદ્ બુદ્ધિસાગરસૂરીશ્વરજી મહારાજ કેવા બુદ્ધિના વિરાટ સાગર હતા. એમણે એવો સાગર છલકાવ્યો કે ૧૪૦ સરિતાનું સર્જન કર્યું. એ સાહિત્યગંગા નિર્મળતા આપે છે. વળી આ બિંદુમાં સિંધુ સમાયેલો છે. એમણે આ સર્જનોનું ચિંતન કર્યું. પોતાની આત્મશક્તિ દ્વારા સર્જન કર્યું, સમજવાનું દોહન કર્યું. દોહન કર્યા પછી નીકળ્યું શું? એક અમૃત અને એક વિષ. અમૃત દેવો લઈ ગયા એમ પૌરાણિક કથા કહે છે તેમ વિષનું પાન શંકરે કર્યું એટલે નીલકંઠ કહેવાયા. આપણે પૂજ્ય શ્રી બુદ્ધિસાગરસૂરીશ્વરજીના જીવનમાંથી સાગરને પામ્યા. અમૃતનું લહાણું કર્યું, જેનાથી આપણા જીવનમાં પ્રકાશ આવે અને અંધકાર દૂર થાય. શબ્દોમાં અધ્યાત્મનું અમૃત એમણે પીધું, આપણને પાયું. સહુને અમૃતનો આસ્વાદ મળ્યો. જે મળ્યું એમાંથી અમૃત આચમન રૂપે છેલ્લા શ્વાસ સુધી વાગોળ્યા કરીએ.
આજે એમના વિશે પરિસંવાદ યોજવામાં આવ્યો છે, જેમાં વિદ્વાનો એમના એક-એક ગ્રંથ-રત્નનો પરિચય આપશે. આ રત્નો આપણા જીવનને ઉજાળે તેવાં છે. આ પરિસંવાદમાં ઉપસ્થિત રહેનાર સહુ કોઈ પર પરમાત્માના અને ગુરુદેવના આશીર્વાદ ઊતરે, એ જ મંગલકામના.
સૂરિશતાબ્દીનું સંભારણું 0 2
