________________
“શ્રી ઘંટાકર્ણ મહાવીરદેવ' વિશે ગ્રંથરચના
- ડૉ. રેખા વોરા “જૈન ધાર્મિક શંકા સમાધાન' નામની લઘુ પુસ્તિકાની રચના પાછળ ઇતિહાસ પડ્યો છે. આચાર્યશ્રી બુદ્ધિસાગરસૂરિજીએ વિજાપુર પાસે મહુડી ગામે શ્રી ઘંટાકર્ણ વીરની મૂર્તિની સ્થાપના કરી છે. આ વીરનું પૂજન સાચો સમકિતવંત જૈન શ્રાવક કેમ કરી શકે ? આવો પ્રશ્ન જિજ્ઞાસુઓએ જાહેરમાં ગુરુદેવને કર્યો હતો. તેના પ્રત્યુત્તર રૂપે જૈનશાસ્ત્રોના આધારે આ પુસ્તિકાની રચના કરી છે.
ઘંટાકર્ણ મહાવીર એક યક્ષ છે. જૈન શાસનના બાવન વીરોમાં તેમનું સ્થાન ત્રીસમું છે. તે સંબંધી ઘણા શોધખોળપૂર્વક વિચારો આ ગ્રંથમાં ગુરુદેવે આપ્યા છે.
ગુરુદેવે શ્રી ઘંટાકર્ણ વીરની સાધના-પ્રતિષ્ઠા ક્યારે અને કેવા સંજોગોમાં કરી તે વિશે “યોગનિષ્ઠ આચાર્ય શ્રી બુદ્ધિસાગરસૂરીશ્વરજી' ગ્રંથના લેખક શ્રી પાદરાકર જણાવે છે કે, “તે સમયે જૈનો પોતાનાં દુઃખ દૂર કરવા માટે પીર, મીરાં દાતાર અને અન્યત્ર જગ્યાએ દોડધામ કરતા હતા, જ્યાં આગળ પ્રસાદ રૂપે અભક્ષ્ય પદાર્થ અપાતો હતો. જૈન ધર્મના મૂળભૂત સિદ્ધાંતોનો હ્રાસ થતો હતો. ગુરુદેવને આવા જૈનોને ત્યાં જતાં અટકાવવા હતા. તે માટે તેમણે ઘંટાકર્ણ વીરની આરાધના કરવાનું નક્કી કર્યું.”
